رواية خلف الابواب المغلقه الفصل الخامس 5 بقلم مشاعر مبعثرة

رواية خلف الابواب المغلقه الفصل الخامس 5 بقلم مشاعر مبعثرة

 

 

البارت الخامس

 

# خلف-الابواب-المغلقة#
الحلقة 5
بقلمي: مشاعر – مبعثرة
الباب دق فتحت لقيتو جاري شايل سيرمس شاي وكيس عيش وبسكويت لمن شافني شايله السيرمس ضحك وقال لي سبقتك.
: اسي نوديه وين الشاي دا كلو؟
: نشربو بس.
فضلتو لجوا قعد مع الاولاد شويه وقال ماشي الشغل وقفتو.
: خير يا جارتي؟
: انا ما بقدر اعيش كدا معتمده عليك!
: قصدك شنو؟؟
اتنهدت وقلت له انا ما خليت شغله ما جربتا طعميه زلابيه تلاجه لاسكريم ما عندي عشان اعملو في النهايه كل القروش المعاي ضاعت ساي ومحتاجه لشغل والله العظيم😞
: ابو اولادك وين؟
: خليني احكي لك طيب اقعد لو سمحت.
قعدنا في السرير البرا وبديت احكي له :
انا زوله اتعودت على الاستغلال وانو اعيش بحريه وكرامه اتحررت حتى من قيود الاسره، اتعودت انو أمد دائما وبحس انو الناس كلها معتمده علي لدرجة بتضايقني وبزهج، يعني تعاملي مع الناس مقتصر على الحاجه البمدها دي تاني ما بفرق معاي! يعني اديك تتعالج لكن ما بمشي معاك المستشفى! ولا حتى بسأل عن صحتك، كل الضغوط دي خلتني في حالة زهج و عدائيه مع كل البتعامل معاهم، ابوي وصل معاي لمرحلة قال لي تاني حاجه منك ما عاوزا، وكان جادي بس انا مع الأسف م اهتميت واعتبرت تصرفو دا تعقيد💔، اتزوجت غصبا عنهم من راجل كانو رافضنو وو…. والمسؤوليه غيرتني اكتر ماكنت بقدم حاجه لاسرتي، مهما احتاجو ولا عندي شغله بجار ولا قريب ما بتزكر زاتو اخر مره طلعت من الخرطوم متين قبل الحرب، حتى المناسبات دي برسل قروش بس ما بمشي لأي زول، عايشه عشان نفسي واسرتي وبس ، انا حاليا ما بقدر امد يدي لزول.
: وفاكره الناس كلها زيك م بتساعد او بتعمل كدا اجباري بس عشان تحافظ على صورتا، بعرفا حركاتكم دي .
: المهم دي انا ي ابو ليان بكل المساوئ السمعتا دي كنت شغاله في مدرسه خاصه وبطلع مصاريفي براي اهلي ديل والله ممكن اعدي سنه م اتصل بهم وقصدي بالكلمه دي اقرب الاقربين امي وابوي واخواني😞.
: لا حول ولاقوة الابالله.
: قول العاوزو عني بس انا انا نتكست زوحي طلقني وطلع من البيت تاني ما جاء ولا راضي يصرف على اولادو ولا حتى بتفقدهم كأنو ما صدق اتخلص من قيد الأسره دي ، والله هو وين اسي انا ما عارفه فات خلاني حامل بمهيلم، ولدتو براي ما قدرت حتى اكلم امي لانو ما عندي عين وهي زعلت لمن سمعت عني جات واتشاكلنا شديد، مشت زعلانه منى ما تممتني الاربعين زاتو. قالت لي بكرا بتحتاحي انا قلت لها مافي سبب بحوجني ولا يرميني عليكم عندي شغلي وبيتي الملك ومدخله اولادي احسن الرياض.💔
هدا ربنا استجاب لكلاما وانا فعلا احتجت طلعت من بيتي بسبب الحرب ولا حتى دهبي ما شلتو ولا الاثاث العملتو، طلعنا الا بروحنا وشنطة ملابسنا انا اولادي كان معاي قروش مخبياها وصندوق صرفتو على الدبله بتاعتي وحلق كنت لابساه بعتهم اجرت البيت دا واشتريت بالقروش الكم حاجه الفي البيت دي جربت الشغل وكل مرة بفشل والقروش تروح اكل وشراب، الحياة قست علي شديد لمن وصلت للوضع الانا فيه دا حتى تلفوني بعتو😭😭😭😭 امي كانت بتتصل وتقول لي تعالي ولا امشي لواحد من الأهل القراب، بس انا ما بقدر امشي لزول بياتو عين امشي؟ انا ما خليت علاقه كويسه مع زول، خاربه وش مع كل الناس حتى جدي القاعدين معاه ناس امي دا في يوم من الايام قال لابوي بنتك دي قطعت ارتباطا بينا وانسخلت مننا خلاص اقنع منها😭
الصدمه على وشو كانت كل مره زايده وصدمتو فيني قال لي
: لا حول ولاقوة الا بالله ما عارف اقول لك شنو.
: انا م عاوزاك تشفق علي لاني وصلت لهنا بسببي، عنادي وكبريائي الفارغ ذي م انت قلت هو الدمرني.
عليك الله شوف لي شغل اي حاجه بشتغلا انا خلاص بقيت انسانه عاجزة لا نفعتني قرايتي ولا شغلي ولا حتى زواجي وبيتي البتباهى به، رجعت صفر! وحيده وفي رقبتي ٣ اطفال.
بكيت لاول مرة وانكسرت قدام زول، ما قدرت حتى اهدا وهو بعاين لي بس كأنو عاوزني اطلع الجواي وارجع خفيفه وخاليه من الهموم الكانت طابقه على صدري وحارماني النفس.
انا ما من حقي احاسبك او احكم عليك، بس اسمعي مني اهلك ما بزعلو منك مهما حصل ولا بعايروك بالفات ارجعي لهم م حاتخسري حاجه.
هزيت راسي وقلت له الاحتمال دا مستبعد ناهيك عن الكرامه امي وابوي قاعدين عند جدو في الفاشر وما عندهم مصدر دخل والبيت مليان انا ح اكون اضافة لهمومهم م اكتر غير كدا يا جاري انا القروش البسافر بها دي اولى بها اولادي ياكلو ويشربو منها ما معروف امكن الحرب تنتهي ونرجع بيتنا.
: والله يا سمر مافي بشريات الوضع ماشي لاسواء رجعة شنو البتفكري فيها ومن ناحية كلامك صح لانو حتى السفر لمكان بعيد ذي دا م أمن لك ب أولادك ديل.
وقف مسافه يحك راسو فجاءة قال لي : انتي مش كنتي معلمه؟
قلت له : ايوا.
: ممكن تدرسي بناتي؟ انا لي فترة بفتش لهم في استاذ كويس، الاجازة طالت ما معروف المدارس تفتح متين وهم نسو كل القروه زمان.
: بالجد؟؟ 😳
: ايوا لو موافقه انا بديك قدر اجر الاستاذ الخاص.
: وممنوع تجيب لينا اي حاجه للبيت، انا بشتري اي حاجه من القروش الباخدا مقابل شغلي .
: اتفقنا
انا فرحت شديد خاصة اني ما دافعه قروش الايجار وعندي حاجات كتيره لازماني.
جاب لي الكتب وانا من اليوم داك بقيت امشي ادرس بناتو او هم يجوني والقروش البديني لها حلوة والله بس اخرت الايجار شويه عشان اغطي مصاريفنا التانيه سيد البيت كان مديني مهله لبداية الشهر قلت ما مشكله بدبرا للزمن داك.
اهم حاجه علاقتي بجاري وبناتو بقت حلوة شديد انا لو لقيت عندهم شغل كتير بساعدهم، وهو في المقابل لو لقاني ما قادرة اعمل حاجه بعملا لي، بعزمونا ونعزمهم واولادي بحضرو التلفزيون معاهم مرات ينومو الا هو يجي شايلهم شادن لمن نامت عندهم يوم.
وكل يوم بصبح علينا ويقبل راس اولادي لمن يفوتهم، اشتريت لي تلفون صغير ممشيه به اموري
يوم كنت ماشه ادرس ليان كالعاده و اولادي اصلا كانو معاهم بحضرو التلفزيون بس شايله مهيلم في يدي، لقيت الباب فاتح، دخلت طوالي وسامعه صوت لين بتتكلم مع ابوها:
ي ابوي انا ما بفهم منها والله وبالذات الرياضيات بس بقول لها فهمت عشان ما تزعل…يتبع♥

 

• لقراءة باقي فصول الرواية أضغط على (رواية خلف الأبواب المغلقة)