رواية جيرانا الفصل الرابع 4 بقلم حميدة عبدالحميد
رواية جيرانا الفصل الرابع 4 بقلم حميدة عبدالحميد
لقراءة الرواية كاملة بدون إعلانات (اضغط هنا)
البارت الرابع
#جيرانا4
#حميده_عبدالحميد
جدعت التلفون في الأرض وبقيت ارجف من الخوف، وشويه كدا وقلبي كان ح يقيف كنت بعاين للتلفون وهو مجدوع في الارض وكل مرة الاسم يتغير بين ميساء وفدوي ولولا إيماني القوي لكان جنيت زي الوقت دا هنا التلفون طفا خلاص والجو بقا شبه هادئ، بس زي م يقولو بعد الهدؤ عاصفه٠٠
أصوات الطبول رجعت واشتغلت تاني وبطريقه أقوى من اول واختلطت مع أصوات كشكشة وأصوات سلاسل أو جنازير وحاجات لا يمكن عقلكم يستوعبها رفعت نظري من الأرض وبقيت اعاين في شجرة الزونية بكل حذر ٠٠٠ لحدي م جا ثعبان أسود وضخم نازل من بين الفروع، هنا حركتي اتشلت كُليا وبقيت انادي في ناس امي بس صوتي كان رايح كنت مكتفه وواقفه زي الصنم لا قادرة اتحرك ولا قادرة اتكلم ٠٠
الثعبان وقف زي الزول وشّد على جسمو وعيونو كانو حُمر بقا يعاين لي بطريقه حادة شديد وانا خلاص هبطت وشويه كدا وح اسيح من الخوف، بديت اقرا في ايه الكرسي بس كانت صعبة على وكل م أبداها كنت م بقدر اتمها لحدي م اتشجعت وقدرت اخلصها٠٠٠ وفجأه جا هواء سُخن طالع من الشجرة. لدرجة حسيت بيهو جوا عضامي الشجرة اهتزت بطريقه مخيفه لحدي م استقرت والثعبان اختفى من قدامي وتاني ما حسيت بنفسي ٠٠
صحيت ولقيت نفسي راقدة في السرير وامي قاعدة جنب راسي وابوي قاعد بالجهة التانيه واخواتي كلهم محاوطني فتحت عيوني ببطء وقعدت في منتصف السرير، امي قالت لي صحينا الصباح ولقيناك نايمه في الحوش جنب الشجرة،
اتذكرت الشي الحصل لي امس٠٠٠ عاينت لي ناس امي كلهم وسكته لانو متأكدة مافي زول ح يصدقني، قلت ليها اي يمكن شالني حمار النوم، هزت راسها بتحسر وقالت لي شايفاك اتغيرتي شديد ي سندس وانا شايفه احسن تمشي الرقيه وحالتك دي نهائي م عجباني جا ابوي وضغط على يدي برفق وقال لي كلام امك صح ي سندس اسمعي الكلام قلت ليهم انا لو جنيت ح اجن بي سبب كلامكم دا و ياريت ماف زول يقول لي امشي الرقيه لانو انا نصيحه ولو صحي عايزين مصلحتي خلونا نرحل من المنطقه دي ونمشي اي مكان
ابوي قال لي بس لي؟؟ انا شايف المنطقه دي احسن من اي مكان والايجارات فيها رخيصه والعيشه مُتيسرة ف انتي لي عايزة لينا الشلحته والتعب قلت ليو طيب ي ابوي التشوفو مناسب كلو اعملو قال لي تمام
قامو كلهم وطلعو من غرفتي وانا رجعت ورقدت ف السرير ووجهت نظري في سقف الغرفه وبديت استحضر في الشي الحصل لي امس معقولة الخلل يكون مني انا؟ وهل انا بديت اجن فعلا؟ وكلام ناس امي صح وهل انا محتاجه رقيه ؟ سحبت المخدة في وشي وحرفيا صدعت من التفكير ٠٠٠
بعد الضهر جاتني امي لابسه توبها وشايله صينيه بسبوسه وسكر وبُن قلت ليها خير على وين قالت لي ماشين لي جيرانا ناس فدوى نشرب معاهم الجبنه وانتي حالتك م تمام ف اقعدي في البيت احسن ليك ونحنا م ح نتأخر وابوكي زاتو طلع قلت ليها تمام امشو الله يسهل ليكم وقلت في سري (دا لو لقيتو البيت فاتح) قالت لي تمام قفلت الباب وطلعت ٠٠
. بعد م اتأكدته انهم طلعو خلاص وفاتو لبست عبايتي وطلعت ب وراهم ٠٠ لحدي م وصلت بيت جيرانا ولقيتو نفس الشي مُطبل طيب ناس امي فاتو وين؟ طلعت تلفوني من جيب العبايه واتصلت لي ميعاد طوالي فتحت الخط قلت ليها وين انتو؟ قالت لي في بيت جيرانا قلت ليها بيت ناس فدوى؟ قالت لي اي رفعت نظري. وعاينت للباب تاني، قلت ليها متأكدة انتي يابت؟ قالت لي ثواني ارسل ليك صور ف الواتس ٠٠قفلت الخط ، وأنا فتحت الشبكة طوالي نزلت لي رسالة منها ف الواتس كانت مرسلة لي مجموعه من الصور وفعلا كانو قاعدين ف بيتهم وشفت المرة ديك قاعدة و مجهزين عدة الجبنه رفعت نظري تاني وعاينت للبيت وكان مطبل مشيت وطاوقت بالقدة وكان نفس الشي ٠٠٠ بلعت ريقي بتعب وحيلي برد خلاص٠٠٠
طيب لي البيت عامل لي كدا؟ بجد ماقادرة استوعب ٠٠٠ و فجأءة ظهر لي الشاب داك كان غضبان شديد. قال لي موش انا قلت ليكي م تجي البيت دا. قلت ليو انت منو قال لي امشي من هنا ٠٠٠
رجعت كم خطوة لحدي م وصلت لفت شارعنا وجري على البيت فتحت الباب ولقيت امي قاعدة تحت شجرة الزونية وقعد تقطع ف البصل ٠٠ وقفت مسافه وكنت بحاول استوعب معقولة؟ موش ناس امي مشو للجيران؟ وهسي كنت بتكلم مع ميعاد وشفت صورة امي قاعدة معاهم ، هنا رفعت راسها وقالت لي مشيتي وين ي بت، سندس. قفلت الباب وجيت داخله وقلت ليها بس موش انتو مشيتو للجيران ي امي؟ ابتسمت ابتسامه باهتة ولاحظت للبصل لونو بدا يتغير واتحول لي فاكهة مدورة لونها أحمر وشويه كدا بقا كِبده حمراء وبي دمها، قلبي بدا يدق شديد بديت ارجع لي ورا وقلت ليها انتي منو؟ قالت لي انا امك وحركة يدها بقت سريعه وهي بتقطع في الكبدة ٠٠٠ قلت ليها لا انتي م امي ٠٠
قامت علي حيلها وقالت لي اناااا امككك بصوت خشن. شديد قلت ليها لاااا انتي م امي ٠٠٠
بقت تضحك بي اكتر من صوت وكأنهم مجموعة ٠٠٠ قلت ليها انتي منو ودايرة مني شنو. قالت لي انا جارتكم وهنا صوتها رجع طبيعي
قلت ليها دايرة مني شنو وانا عملت ليك شنو؟
قالت لي انتي اذيتينا
قلت ليها اذيتكم؟
قالت لي اي انتي رشيتي موية تحت شجرة الزونية ٠٠انتي قتلتي ولدي لانو لمن كنتي بترشي في الموية رشيتو وتاني جدعتي فيو الطوبه لحدي ما مات وهو كان صغير شديد وانا م ح اخليك الا انتقم لي ولدي بلعت ريقي بتعب وقلت ليها معليش م كنت قاصدة رفعت صوتها وقالت لي ناس امك حجزتهم خلاص وتاني م ح تشوفيهم ٠٠٠
- لقراءة باقي فصول الرواية أضغط على (رواية جيرانا)