رواية جيرانا الفصل الثاني 2 بقلم حميدة عبدالحميد

رواية جيرانا الفصل الثاني 2 بقلم حميدة عبدالحميد

 

 

البارت الثاني

 

#جيرانا2
#حميده_عبدالحميد
بلعت ريقي بتعب وانا بعاين ليهم وشكلو حسو بي وكلهم اتلفتو على ونظراتهم كانت باردة شديد٠٠ ضغط على يد امي وفي نفس اللحظة كُنت بعاين ليهم
_امي ضروري نتكلم انا وانتي
=اجي يا بت نتكلم في شنو الضيوف قاعدين وحارسين الغدا امشي ساعدي اخواتك جوا في المطبخ ٠٠
شكلو م ح اقدر اتكلم مع امي ولا هي ناوية تتفاهم معاي. كنت بعاين ليهم شديد وهم كذلك !وما رمشو نهائي ونظراتهم كانت حادة شديد وكأنهم كانو بتفحصو في شخصيتي، قويت قلبي وقررت اول م يطلعو ح احكي لي ناس امي واخواتي بقصتهم كلها، دخلت المطبخ جوا ولقيت اختي الكبيرة مُيعاد جهزت الصينيه خلاص، وطالعة بيها طبعا انا اسمي سندس ، ميعاد قالت لي جيبي معاك الموية قلت ليها طيب رفعت الجك من المصطبه وطلعت برا لقيتهم كلهم قاعدين وحارسني امي زحت لي عشان اقعد جنبها و م اكضب عليكم صراحه كنت خايفه شديد ويمكن شويه كدا وح اغمر من الخوف قعدت جنب امي وبقيت مُقاصداهم رفعت عيني بحركة سريعة وشفت امهم بتعاين لي شديد كسرت نظري في الصينيه وقلت بسم الله ومع قولة بسم الله بتها الكبيرة وقفت على حيلها واتصنمت امها رفعت يدها وقعدتها تاني، امي قالت ليها خير ي فدوى طبعا هي اسمها فدوي قالت ليها خير بس بتي شويه عيانه هنا اختي الكبيرة إدخلت وقالت ليها ربنا يديها العافيه بس لي من جيتونا هنا و م سمعنا صوت بتك الكبيرة ابتسمت ابتسامه باهتة وقالت اي هي بكما قالت ليها اها٠٠٠ واصلنا اكل وانا كل شكوكي ثبتت واتأكد انو ديل أبدآ ما من الإنس واكيد ديل من الجن ولاحظت لي حركة يدينهم لمن يرفعو الاكل من الصحن بتكون ثابته وكأنهم ماقاعدين ياكلو وشكلو ماف زول انتبه للنقطه دي غيري انا ٠
بعد ربع ساعة قالو شبعو خلاص وقامو على حيلهم امي قالت ليهم اشربو شاي قالت ليها لا م بنحب الشاي طبعا الأكل الجابو عبارة عن لحمة بس ومعاها رز و اول مرة اشوف رز زي دا كان طوال بطريقه غريبه وشكلو زاتو غريب بعد ما طلعو هنا داب قدرت إتنفس
اتنهدت وقلت لي ناس امي طبعا لمن مشيت، بيتهم عشان اودي ليهم المديدة لقيت بيتهم مهجور وجا راجل كبير قال لي البيت دا مهجور واسيادو ماتو ليهم ٨ سنة
كلهم عاينو لي وبقو يضحكو قلت ليهم علفكرة انا جادة. امي قالت لي يابت دا كلام شنو وكيف بيتهم مهجور حيكونو جو من وين مثلا لا وكمان ماتو.؟ شكلو الراجل دا غشاك ساي… سكته منهم وتاني م زده ولا حرف
قضينا اليوم عادي وجا وقت النوم خلاص. رتبت المطبخ وغسلت العدة الوسخانه صليت العشاء وقريت شويه قران و بعد الساعة ١٠م كل زول فات ع غرفتو٠٠٠ طفيت اللمبة ورقدت نمته
حوالي الساعة وحدة بليل حسيت بهوا بارد في رجولي وجسمي كلو كشا فتحت عيوني بحركة سريعة وكان في شي ابيض مديني ضهرو، قاعد جنب رجولي ضربات قلبي اتسارعت وحسيت بصوتي مكتوم وماقادرة اتنفس
هنا الشي دا اتلفت على وكانت دي زاتها جارتنا فدوي ابتسمت نص إبتسامه وقالت
شجرة الزونيه ٠٠٠ اطلعو منها ٠٠٠
حاولت اتكلم بس ماقدرت قالت كلامها دا ومشت على الباب لحدي م طلعت
وتاني ماحسيت بنفسي ٠٠٠
صحيت بصوت امي٠٠ فتحت عيوني ببطء قالت لي يابت الشمس طلعت وابوكي زاتو جا نفضه البطانية مني وقمت على حيلي واتذكرت موقف امس معقولة دا حلم ولا حقيقه؟ عاينت لي امي وقلت ليها امس حصل لي كدا وكدا عاينت لي باستغراب وقالت لي حالتك الايام دي ما عجباني.. طوالي اتحركت من جنبها و مشيت لي ابوي لقيتو قاعد ف الصالة سلمت عليه وبديت احكي ليو بكل شي وظاهر عليو م اقتنع بكلامي اتنهد وقال لي عشان انتي ترتاحي فنحنا هسي ح نمشي بيتهم ونشوف اذا كلامك صح او غلط فرحت شديد وقلت ليو طيب جريت لبست عبايتي وهو كلم ناس امي. اختي قالت لي غايتو الراجل دا م عمل فيك خير م اشتغلت بيها ٠٠
طلعنا كلنا بي أبوي ومشينا على بيتهم كنت انا ف المقدمة عشان اثبت ليهم انو كلامي صح. و اول م وصلنا كانت الصدمة٠٠ البيت كان فاتح ومافيهو اي طبلة وكان نضيف من برا طبعا اتهجمت وقلت لي ابوي بس امس م كان كدا عاين لي من دون م يتكلم ورفع يدو طرق الباب بعد لحظات جات بتهم الوسط ااصغيرة عاينت لينا كلنا بحركة سريعه وقالت نورتو امي واخواتو عاينو لي نظام شوفي كلامك طلع غلط قالت لينا اتفضلو، حرفيا كنت مترددة شديد وبديت أصدق كلام ناس امي وانو فعلا الراجل داك غشاني دخلنا جوا بي ابوي والبيت كان حلو شديد بعد لحظات جات امهم من جوا قالت لينا كيفكم ولاحظت ليهم لمن نقول ليهم سلام عليكم ماقعد يردو بي وعليكم السلام ، جات وقالت لينا نورتو بيتنا وقالت لي بتها جيبي ليهم عصير دخلت جوا وبعد دقائق جات بتها شايله عصير في كبابي وكان لونو احمر شديد لدرجة ممكن تقولو دا دم عديل. مدت ليهم بالصف لحدي م جا دوري هنا وقفت وبقت تعاين لي وبنفس النظرات الحادة رفعت يدي وشلت الكباية ختيتها في الطربيزة وقلت ليها انا ممنوعه من شراب العصائر والحاجات الحلوى عموما ناس امي عاينو لي يتعجب نظام من متين بس م اشتغلت بيهم قعدنا شويه وطلعنا وهم وصلونا للباب بعد م مشينا مسافه ابوي قال لي شايفه كلامك طلع غلط ودي هلاويس منك ساي وتاني م اسمع منك كلام زي دا قلت ليو حاضر بس كنت لسه شاكه وصلنا نص الطريق وقلت لي ابوي نسيت الدبوس حقتي في الكنبه ماشه اجيبها قال لي طيب نحنا ح نمشي البيت وانتي الحقينا قلت ليو تمام
لفيت ورجعت بنفس الشارع لحدي م وصلت بيتهم وهنا كانت الصدمة الكبيرة البيت كان مُطبل وظاهر عليه مهجور كان في قدة صغيرة مررت نظري وبقيت اعاين بيها وكان من جوا برضو مهجور لدرجة ملان تراب العنكبوت باني في كل ركن، رفعت نظري وحسيت بيد باردة ماشه في كتفي اتلفت بسرعه واتفاجأت ٠٠٠٠

 

• لقراءة باقي فصول الرواية أضغط على (رواية جيرانا)