رواية جريمة الدجال الفصل الأول 1 بقلم محمود الأمين

رواية جريمة الدجال الفصل الأول 1 بقلم محمود الأمين

 

 

البارت الأول

 

انا كنت فاكر انها جريمه قتل عاديه، مكنتش اعرف اللي داخل عليه.. مكنتش اعرف انهم هياذوني
في اليوم ده خلصت شغلي وروحت.. كنت بتصل على مراتي كتير مكنتش بترد عليا.. طلعت الشقه كانت الدنيا ضلمه
وده مش من عوايدها.. فتحت النور وبدأت أنادى عليها في الشقه كلها بس مفيش رد.. دخلت الاوضه وشوفت المنظر اللي مش هنساه طول عمري
مراتي كانت على السرير ومبرقه وفاتحه بقها على الاخر، وفي جوه بقها شعر
…
الجزء الأول
كنت قاعد في مكتبي زهقان.. ومش لاقي حاجه اعملها، طلعت تليفوني كده وقولت افتح الفيس شويه.. لحد ما الباب خبط
واللي دخل كان ثابت واتكلم وقال
_ في اشاره جت يا فندم عن جريمه قتل في ميت غمر
= يا فتاح يا عليم يا رزاق يا كريم، طيب يا سيدي اديني قايم
…
اتحركت انا وثابت على الاشاره… معلش دخلت في الاجواء على طول ومعرفتكمش بنفسي انا حسن التهامي معاون مباحث والمفروض دلوقتي اني رايح استكشف جريمه قتل
.. لما وصلنا كان المنظر جوه صعب شويه
راجل وست في وضع مش مناسب خالص، والاتنين مقتولين بالرصاص
الراجل واخد طلقه في قلبه والتانيه في منتصف رأسه
اما الست فالطلقتين مستقرين في منطقه القلب
ومن غير تفاصيل ملهاش لازمه او معتاده
وصل فريق من البحث الجنائي وبدأوا يشوفوا شغلهم، اما انا فبدات اتفقد البيت كده بعيني.. واضح انه الراجل ده ليه علاقه بشغل السحر والاعمال
وده واضح من خلال الكتب اللي موجوده، المبخره اللي قدامه
الجو العام بيقول ان الشخص ده دجال
بس هل الجثه اللي جنبه دي.. جثة مراته ولا أي؟
…
وبعد ما الناس خلصت شغلها.. اتنقلت الجثث على المشرحه، وبدأت التحريات
وعرفنا مين هما اصحاب الجثث
جثه الراجل كانت معروفه لاهل المنطقه.. عتمان الشايب
وزي ما توقعت هو دجال بيعمل اعمال سحر وشعوذه
اما عن جثه الست
جميله علي السيد… ربه منزل ومتزوجه من مدرس لغه عربيه
وساكنه في حته اسمها المنزله في محافظه الدقهليه
…
يعني المجني عليهم من محافظه واحده.. بس هنا التحريات اثبتت ان الاستاذ كمال زوج المجني عليها.. متغيب عن المدرسه من اسبوع
….
طلع امر ضبط واحضار للاستاذ كمال.. اللي لما القوه دخلت بيته لقيته قاعد مستنيهم، كانه عارف انهم جايين ده ومش كده وبس
كمال لما جه وقف قدامي.. اعترف بمنتهى البساطه ان هو اللي قتل مراته والدجال
وهنا بدأ الحوار ما بيني وما بين كمال
_ استاذ كمال حضرتك اعترفت بقتلك لزوجتك والشخص اللي كان معاها، ممكن نعرف سبب القتل؟
= مش مهم الاسباب.. انا قاتل ومعترف.. الاسباب دي هتفيد في إى؟
انا عارف ان كده كده هتعدم
_ لا هتفرق طبعاً.. خصوصا ان احنا لقينا مراتك مع الراجل ده في وضع مش كويس.. يعني ممكن حضرتك تكون دخلت عليهم لقيتهم في الوضع ده، فدافعت عن شرفك وقتلتهم وساعتها ممكن تطلع من التهمه دي كلها
…
سكت كمال ومتكلمش.. كملت كلامي وقولتله
_ انا بس عايز اعرف.. مراتك كانت عند الراجل ده ليه؟.. هل هي كانت بتحبه مثلا وكانت بتخونك معاه، ولا في سبب تاني؟
= مش عارف.. انا معنديش اسباب وزي ما قولت لحضرتك انا قتلتهم وخلاص، انا راجل معترف بجريمتي
_ مفيش حاجه اسمها كده.. انت مش عايز تساعدني ولا تساعد نفسك
يا بني ادم اتكلم.. قتلتهم ليه؟
= حضرتك ممكن تعتمد السبب اللي عندك.. الخيانه
_ طيب بس اعتقد انك عندك اسباب تاني؟
= لا معنديش
_ طيب هو حضرتك كنت بتشك في مراتك.. عشان كده راقبتها ولا انت كنت عارف ان هي عند الراجل ده لسبب تاني؟
….
لما سألته السؤال ده.. انهار وبدأ يعيط وحط ايده في جيبه، وطلع موس وكان عايز ينتحر.. ثابت جري عليه ومسك الموس قبل ما يقطع شراينه
والراجل وقع على الارض وبدأ يصرخ
قومته من مكانه وقعدته على كرسي.. وطلبت منه يهدى، وقولت لثابت
هات كوبايه ميه بسرعه يا ثابت
…
_ اهدى.. اهدى يا استاذ كمال، انت عايز تنتحر ليه بس فهمني؟
= مكنتش عارف ان الامور هتوصل لكده.. انا مأجرمتش عشان كنت هتجوز عليها.. هي كانت مش بتخلف.. وانا كنت عايز اسمع كلمه بابا
مكنتش حارمها من حاجه.. وفهمتها اني مش هتنازل عنها ولا هبعد عنها وانها هتفضل على ذمتي.. بس هي كانت رافضه
بس اخر حاجه كنت اتوقعها.. انها تكون سبب الخراب اللي حصل في حياتي.. وكمان في النهايه تخوني
_ طيب اهدى يا استاذ كمال، اتفضل اشرب الميه وعاوزك تهدى كده وتحكيلي كل حاجه
…
كمال طلب مني ان احنا نتكلم على انفراد.. فطلبت من ثابت انه يخرج ويسيبنا
واتكلم كمال وقال
= انا كنت بحب جميله جداً.. ما فيش واحد كان بيحب مراته زي ما انا كنت بحب جميله.. بس كان نفسي اخلف.. كان نفسي اسمع كلمه بابا
ولما الحمل اتأخر اخدتها وروحت لدكتور وصدمني لما قالى
للاسف مدام جميله مش هتقدر تخلف.. عندها مشكله في الرحم، حاولت اهون عليها وانا مكنتش عارف اهون على نفسي
كل ما كنت اروح عند حد من قرايبي.. واشوف عياله تصعب عليا نفسي
لحد ما اخدت اكتر قرار غلط في حياتي.. قررت اتجوز على جميله
بس هي مكنتش متقبله القرار ده.. وطلبت مني اني لو هتجوز يبقى اطلقها
قولتلها مش هعرف.. وانها هتفضل على ذمتي حتى لو اتجوزت
وفعلا بعد اسبوع واحد كنت متجوز، اتجوزت داليا بنت خالتي.. رغم اني مكنتش بحبها بس هي كانت بتحبني من زمان
وبعد جوازي بشهر.. عرفت ان داليا حامل.. الفرحه مكنتش سيعاني واول حد جريت ابلغه كانت جميله، كنت فاكر انها هتفرحلي
لكل اللي قالته وقتها مبروك
ومن بعد اليوم ده.. حياتي اتقلبت 180 درجه.. انا فاكر كويس يومها كنت قاعد قدام التلفزيون، وداليا كانت نايمه في اوضتها
واتفزعت على صوت صرخه منها.. ولما سالتها في ايه بتصرخي ليه؟
قالت
« انا كنت نايمه.. ولقيت حد نام جنبي في الاول افتكرته انت، بس لما بصيت جنبي.. لقيت واحد وشه كله شعر، عينيه حمرا زي الدم
صرخت وانت جيت علي الصوت»
طلبت منها تهدى.. ودخلت نمت جنبها، وصحيت على صوت في الصاله زي صوت خروشه
روحت ناحية الصاله وقولت اكيد في حرامي.. لكن اللي شوفته كان مفزع لقيت مراتي بتخبط دماغها في الحيط ووشها كله دم.. وبصتلي وقالت
« ده مش ابنك.. مش ابنك»
وفي لحظه لقيتها واقفه في وشي ومسكتني من رقبتي، وفضلت تخنق فيا
****
هنا قطعت كمال وقولتله
_ قبل ما تكمل في السكه اللي انت بتحكي فيها دي، الكلام ده كله مش منطقي.. ومحدش هياخد بيه.. قولي الحقيقه عشان اعرف اساعدك
..
في اللحظه دي عينين كمال اتقلبت للون الاسود.. وابتسم وقال
حتى لو حكالك هتعرف تساعده.
ولقيته قام من مكانه.. وقال… يتبع الجزء الثاني

 

• لقراءة باقي فصول الرواية أضغط على (رواية جريمة الدجال)