رواية تاج ونوح الفصل الثاني 2 بقلم إيمان شلبي

رواية تاج ونوح الفصل الثاني 2 بقلم إيمان شلبي

البارت الثاني

-احمدي ربنا ياتاج لولا وجودك النهارده في نفس المكان كنتي هتفضلي معلقه نفسك بحبال دايبه صدقيني ده خير ليكي

دموعي كانت نازله علي خدي وانا باصه قدامي بشرود وحزن العالم كله في قلبي

مش قادره انسي شكلهم وهما خارجين من الكافيه وهو حاطط أيده علي ظهرها عشان يعديها من جنب الشباب اللي. واقفين

رفعت راسي وانا ببص لاختي بدموع :

-ليه علقني بيه ؟

قربت مني ومسكت ايدي وهي بتبصلي بشفقه وحزن :

-اهو ده اللي أنا كنت خايفه منه ياتاج ،كنت طول الوقت بحذرك منه واقولك متعلقيش نفسك بحبال دايبه ومتتعشميش أنه ممكن يحبك

قولتلك أنه حتي لو بيحبك فعشان انتي بنت عمه وشايفك اخته الصغيره مش اكتر

عيطت وانا برد بصوت متقطع :

-ب بس ب بس هو بس هو كلامه كله كان بيدل أنه معجب بيا

أفعاله ونظراته ليا لما بيشوفني ،كلامه كل يوم معايا بالساعات كل ديه كانت أشياء كفيله تخليني اتعلق واتعشم

انا معشمتش نفسي من فراغ هو السبب

هو اللي خلاني احس أن مفيش غيري في حياته ،ليه عمل فيا كده ،انا آذيته في ايه ،ليه يعشمني لما هو مش بيحبني

اخدتني في حضنها وانا ما صدقت انفجرت في العياط لحد ما نمت من غير ما احس في حضنها

تاني يوم الصبح صحيت من النوم كان عندي درس مقدرتش اروح

كنت هلكانه من كتر الوجع والعياط طول الليل

فتحت الفون لقيته باعت “صباح الخير ” كالعاده

ابتسمت بسخريه وانا بفتح الماسدج ومحتاره ارد أو لا؟؟

اصلا محتاره اعرفه انا شوفته ولا معرفهوش

وبعد تفكير كبير جدا قررت اعرفه

اخدت نفس عميق ومسحت دمعه نزلت من عيوني وانا برد علي الماسدج وقلبي بيترعش من التوتر والحزن

-صباح النور

شافها فوراً ورد عليا :

-ايه الاخبار

-تمام وانت

-الحمد لله

-مش انا شوفتك امبارح

-ايه ده بجد شوفتيني فين ؟!

رديت عليه والدموع بتلمع في عيني :

-كنت قاعد في كافيه مع بنت ،انا كنت هناك اصلا بس محبتش اجي

-طب مجتيش ليه؟

رديت بهزار عشان ميحسش اني زعلانه :

-لا ياعم محبتش اكون عزول

-لا يابنتي عادي كنتي تعالي سلمي عليا

رديت عليه بأيموشن بيبص لفوق :

-المهم بس نقول يادبله الخطوبه

ضحك ورد:

-يعني لسه شويه فتره تعارف بس الاول

-امممممم عرفتوا بعض ازاي ياخبيث ياللي كل ما أسألك تقولي مش مرتبط اخس عليك بجد

-والله يابنتي مش حكايه خبث ده لسه الموضوع من يومين

هي كانت واحده زميلتي في امريكا وبعدنا فتره كبيره لما انا جيت هنا ،كلمتني بقي من يومين قالتلي انها نزلت مصر وعايزه تقابلني وكده

-امممممم طب ايه مرتاح ؟

• لقراءة باقي فصول الرواية أضغط على (رواية تاج ونوح)