رواية رغبة في الإنتقام الفصل الخامس والعشرون 25 بقلم نوسة حمد

رواية رغبة في الإنتقام الفصل الخامس والعشرون 25 بقلم نوسة حمد

 

 

البارت الخامس والعشرون

 

#رغبة_في_الانتقام25
#نوسه حمد
خالي قال لي جينا نخطب ندي لي ولدي عشان ما نقطع صله الرحم فجاه اتزكرت امي لمن كانت بتسكهم سك لصله الرحم وكانو بتهربو منها ومفتكرنها محتاجه ليهم وامي عمرها ما مدت يدها لي زول بس كانت بتفتش لي صله الرحم وكانت طالعه من حق الله لمن ماتت بس هم انانيين شديد ما بحبو الا نفسهم واصلا في الحله معروفين قلت ليهو صله الرحم الما لقتا امي نحنا ما محتاجين ليها اتزكر يا خالي انا كنت صغيره مافاهمه اي شي كل م تحصل حاجه برفع سماعه التلفون اتصل عشان تكونو عارفين البينا والعلينا وعشان صله الرحم الانت بتتكلم عنها دي بس انت بالذات كنت بتحرجني وبتقفل الخط في وشي ابوي كان بين الحياه والموت شحدتك عديل احرجتني كنت مجدوعه في الشارع لجأت ليكم قلت لي نحنا ما عندنا فيك

 

 

 

شغله انت لو نسيت انا بزكرك ولا مفتكرني نسيت انا ممكن انسا تعامل اي انسان الا تعامل الاهل وابوي البتتكلمو عنو وبتنبزو فيهو دا موش كنتو سبب في فقدان وظيفتو وكنتو بتزلوهو وبتطردوهو عشان بس اتزوج اختكم انتو ناسيين انو اي شي قسمه ونصيب ابوي اتزوج اختكم عشان يجيبنا نحنا ظلمتو امي حيه وميته وجاي هسي تتكلم عن صله الرحم انا مستحيل اقبل اختي تتزوج ولدك وعشان أريحك الحمد لله ندي اختي خطبوها وعرسها قريب ح اعزمكم من ضمن المعازيم لو جيتو كتر خيركم لو م جيتو انتو حرين نادر قال لي نوسه خلاص قفلي خشمك دا قلت ليهو م بقفلو اقفلو زي امي عشان لمن نموت اكونو حاقرين بينا انتو كلكم ما شفتو الانا شفتو انا طلعت من بلدي براي انصاص الليالي واتوكلت علي ربنا والحمد لله ربنا م خزلني ووقع في طريقي اولاد حلال وهم السبب في الانحنا فيهو دا وهسي انا خيلاني ديل ما لايماهم والله هم حرين في تصرفاتهم وفي النهايه هم خيلاني مستحيل انكرهم بس البربطنا بيهم ح تكون القرابه غير كده لا لا اخواتي لا انا م ح اخليهم يتزوجو منهم لاهم لا اعمامي الغريب افضل بكتير وارحم منهم خالاتي زعلن مني وقالن لي كتر خيرك قلت ليهن انتن كنتن وين لمن نحنا كنا مشردين كتر خيركم انتو ديل بعد اختي اتفوقت وعرفتو انها اتزاعت ف التلفزيون قلتو عايزين صله الرحم دي ما صله رحم دي انانيه بس واختي مشت للاحسن منكم وربنا يتم علي خير ح ارسل ليكم الدعوه ان شاءالله فاتو مننا زعلانين عشان رفضتهم مفتكرين انو اول م يجو يطقو بابنا نحنا م نصدق ونقبل بس الحمد لله لمن جونا راجعين لقونا اقوا والدنيا بتعلم وبتقوي ❤️🤝
ندي اختي بقت خلاص مدمنه تلفون ودي القالت بتخجل كل مره مشغلاها ليها بقول ليها م تتكلمي كتير بس هو عبيط شكلو اليوم كلو يتكلم معاها والعاجبني فيهو من خطبها تاني ما عتب عتبه بابنا والعجب لمن امش ليهم انا يخجل مني كان بعاملني معامله انا نسيبتو ما اختها بحترمني شديد مهند قال لي عندي شغله عايز اخلصها ونتزوج طوالي وعشان ما نتكلف عرسنا ح يكون واحد رايكم شنو قلت ليهو م عندنا مشكله شوف نادر قال لي نادر شفتو وموافق انتو عندكم ناس ح تعزموهم قلت ليهو والله الا اعمامي وخيلاني وناس حلتنا ديل لو جو بس انا ح اعمل العلي وح أعزمهم كلهم ان شاءالله قال لي تمام ونادر ما عايز حفله ح يسافر بعد الجرتق طوالي قلت ليهو م مشكله الشايفو هو افضل ليهو يعملو قال لي انا عايز حفله ومهيد زاتو بعد كم يوم امشي مع العروسات ديل اختارو الزفاف واشتري معاهن حبستهن قلت ليهو ان شاء الله ام مهند قالت لي انا ما عايزه منكم شي الفطور والحاجات دي انا ما عايزاها عشان ما تتعبي نفسك قلت ليها كيف لكن دي عادات وتقاليد قالت لي لا لا انا ما عايزاها وانتي العليك ماهين ابقي في اخوانك بتكلم معاها كده اميمه جات سايقه ابوي احترتا ابوي اول مره يجي لي ناس مهند ام مهند لبست توبا واستقبلتو قلت ليهو ابوي انت جادي قال لي مالك حسيتو جا عشان يشوف ام مهند وبقيت اخجل من نظراتو طوالي استاذنت قلت ليهم عندو حبوب وهو شغال لي حبوب شنو ي بت انا بلعتهن قلت ليهو تاني تبلعن ارح يابا بعد طلعنا قلت ليهو ابوي ما تعملا ظاهره الناس ديل ما بيرضو قال لي شنو ي بت قلت ليهو شايفاك معجب بي ام مهند قعد اضحك قال لي انتي جنيتي انا والله بحبها ساي في الله بحسها زي المرحومه في حركاتا ماتكوني مفتكراني داير اعرسها يابت عرس شنو انا لو داير اعرس كان عرستا بعد وفاه امك بس المره دي بتكفيني وجواي نيتي ما كعبه والله عالم وشفتك اتاخرتي اميمه قالت لي ارح ليها بس م خليتيني قعدت قلت ليهو خوفتا والله قلت انت تشاغلها قعد اضحك قال لي مشاغله شنو ي بت لا والله انا بس برتاح ليها في الله والله عالم بي نيتي يابتي قلت ليهو طمنت قلبي انا ما عايزه علاقتنا تتوتر بيهم قال لي خلاص كان بتضايقي انا تاني لو جات م بتونس معاها ولي بيتهم م بمش قلت ليهو لا لا مالي الدرجه دي هي زاتا شايفاها بترتاح لمن تونسك قال لي انا ما عايزك تفهمي غلط انا والله بعد كده سبحتي وصلاتي والموت قلت ليهو بعد الشر عليك ان شاء الله بعد خرف يا ابوي قعد اضحك قال لي الزيي مابخرف بموت بدري بس ان شالله اشوفك انتي واختك عروسات وتاني لو موتا النموت قلت ليهو انت ليه بتقول كده قول ان شاء الله اشيل جنا جناكم قال لي ان شاء

 

 

الله وصلنا البيت وحكيت لي ندي بي انو عرسهم قرب فرحت شديد قلت ليها حليل القرايه دي انتي القلتي دايره تقري قالت لي ان شاء الله ح اقرا مهيد وعدني وهو زاتو قال لقا شغل في شركه بترول ف الخرطوم منتظر نتيجه القبول قلت ليها ان شاء الله تكوني قدمك قدم السعد عليهو ويشيلوهو وتمشي تكملي قرايتك هناك وتناديني اجي بس اولدك قالت لي ان شاء الله يانوسه تعرسي بعديني طوالي قلت ليها كمان انا بعد انتي تعرسي مافيني طريقه اتزوج ابوي واميمه وناجي اخليهم لمنو قالت لي مرت نادر بتكون قاعده قلت ليها وذنبها شنو مرت نادر انا المسؤوله منهم لو م لقيت راجل يقبل بي اعيش مع اهلي م بوافق قالت لي طيب دكتور ذكي ي نوسه كان افضل ليك قلت ليها نادر اخوي ماعايزو ومصمم انو يرفضو عشان ولدو اخر مره نبزني وولدو دا زاتو خطبني وانا رفضت قالت لي ياخ مالك ومال ولدو كان تعرسيهو ي نوسه افضل ليك قلت ليها م بقدر اكسر كلمه نادر وكلو لخير وهو زاتو اختفي احتمال اكون اتزوج قالت لي طيب سيف قلت ليها سيف انا الرفضتو لانو متزوج مرتين انا م عايزه راجل مره وخليها علي الله البجي من الله كلو حلو م مستعجله بعد انتي لقيتي البسندك تاني ماشايله هم وعقبال اميمه ما ح اخليها تتعب وتشقا زيي

 

 

كلمت ابوي بالعرس قال لي تكلمي ناس الحله واهلك واعمامك وخيلانك نادر قال لي لا انا بمش اكلمهم بنفسي والمحامي اتصل علي قال لي تجي تستلم القسيمه بتاعت الطلاق فرحت شديد وابوي سجد سجدت شكر وشبع بكا قال لي الحمد لله الما سمعتي كلامي انا كنت عايز ادفنك بالحياه قلت ليهو ابوي عليك الله كفايه بكا كفايه كل مره ضميرك يأنبك الحصل فوق انو انت السبب فيهو كان قسمتي افهمك ليها كيف انت كنت مجرد سبب يعني لو م كنت سبب في السبب البخلي الراجل دا يعقد علي وما اكمل معاهو دي اقدار يا ابوي ماف منها مفر انا اي قدر جاني سمح ولا كعب استقبلتو بصدر رحب ومصيرو يا ابوي كل الأقدار الكعبه بصبرنا عليها ربنا يعوضنا اضعاف الكنا بنتمناهو حضني عليهو وقال لي ربنا يكملك بي عقلك ويعوضك براجل يسندك ويحفظك وانا شايف الدكتور الطلب يدك دا يستاهل نادر من اول كلمتين وقفو قال ليهو ابوي الدكتور دا شيلو من راسك تمام قال ليهو مالو يا ولدي زول عندو مكانتو ف المجتمع قال ليهو لكن عندو ولدو صايع ولافي ساي ابوي طوالي قال ليهو لو كده لا لا بتي م بجدعها
تاني يوم نادر مشا الحله وانا بديت اجهز مع ندي وخطيبتو وخطيبت مهند في الحاجات وحجزت ليهن مرت نادر قالت عايزه جدله بس نادر قال لي العاوزاهو اعملي ليها بعد طلعنا من الكوفير ميه ساعه لافين ف السوق رجعت البيت متاخره لقيت ميه مكالمه من نادر خوفتا شديد قلت ليهو نادر في شنو قال لي عم احمد ي نوسه تعبان ومرقد في العنايه انا من كلموني جيت جاري المستشفى ودخلت ليهو بالقوه وشكلو تعبان تعب موت ومحلفني اشوفك قبل يموت انا كلمت سيف بكره تجي معاهو حسيت قلبي انقطع عم احمد الطيب الله يستر يارب وما تجيهو حاجه ……….يتبع

 

 

• لقراءة باقي فصول الرواية أضغط على (رواية رغبة في الإنتقام)