رواية رغبة في الإنتقام الفصل الخامس 5 بقلم نوسة حمد

رواية رغبة في الإنتقام الفصل الخامس 5 بقلم نوسة حمد

 

 

البارت الخامس

 

#رغبة_في_الانتقام5
#نوسه حمد
ركبت الدفار وركبت اخواني حاج احمد اداني باقي القروش العندو وقال لي يابتي ما اوصيك ابقي علي روحك عشره وعلي اخوانك عشره واكلي لقمه بالحلال وامشي ف الطريق الكنتي ماشه فيهو ما تعايني ليها عند زول وامشي في طريق ربنا وما تخزليني وتشيليني ذنبك وان شالله اسمع عنك كل خير وبدعي ليك م بنساك وان شاءالله ربنا بفتحها عليك وح يرزقك وح يفرحك بي اخوانك بدي فيني ف النصايح دي وانا دموعي عشره عشره بس قويت قلبي شديد بتاع الدفار قال ليهو ماتخاف عليها يا حاج م بتجيها عوجه ويلا عشان الزمن ودعني وفات ضميت اخواني علي والدنيا كانت برد شديد كنت عامله حسابي شايله بطانيتي فرشت واحده رقدنا فيها والتانيه اتغطينا بيها اخواني كانو متكرفسين فيني وخايفين وبقيت احصن فيهم لغايه م نامو وانا زاتي نومتا معاهم م وعيت الا بصوت راجل بصحي فيني فتحت عيوني لقيتو. بتاع الدفار شايل ليهو صحن زلابيه وسيرمس شاي ومعاها كبابي قال لي قومي اسقي اخوانك ديل الشاي لفيت طرحتي فيني وشكرتو واخواني كانو جيعانين

 

 

شربو الشاي واكلو الزلابيه وانا زاتي شربت معاهم وقلبي موجعني شديد كل م اتزكر ابوي قلبي يوجعني اي نعم هو كعب ومعاملتو سيئه بس ف النهايه دا ابوي القلب بيحن بتاع الدفار جا شال الكبابي وقال لينا محتاجين حاجه عشان تاني م ح نقيف الا الظهر وجاب ليهو بسكويت قال لي لي اخوانك والله فعلا الدنيا بي خيرها وتاني رجعنا نومنا كانو فاقدين نوم انا بالذات ما قاعده انوم مرتاحه والرحله رغم انها متعبه بس كانت شيقه وشكلو وصلنا حلفا باب الدفار فتح بس المره دي ما السواق اولاد شباب اتشابهو شديد. قالو لي انتي منو سكت م اتكلمت بتاع الدفار قال ليهم دي بت الامام وقال نوصلها محل ماشين قالو ليهو كيف م تكلمنا انا بقيت مخلوعه م نفسي الراجل يشاكلوهو بي سببي لانو طيب ومدا لي يدو قال ليهم انتو كنتو نايمين وبعدين الدنيا كانت ليل قلت اكسب فيها اجر قالو ليهو نحنا لو وريتنا ما كان خليناها تركب ورا ومعاها اطفال زي ديل ياخ حرام عليك بعد كنت خايفه ابتسمت قلت الحمد لله ولد الناس دا م اشيل ذنبو قالو لي ماشه وين انتي في حلفا قلت ليهم والله انا كنت ماشه اي مكان حلفا القضارف كسلا بورتسودان المهم بس كان عندي اطلع وانتو م قصرتو انا بنزل منكم هنا ف السوق دا وبشق طريقي قالو لي طريقك ياتو طريق انتي اهلك من هنا قلت ليهم انا حلفا دي ف الخريطه ما بتزكرها واقعه علي وين انا بس عايزه اقعد في اي مكان اشتغل واربي اخواني ديل انا امي ميته قالو لي وابوك قلت ليهم ابوي زاتو ميت وخلو لي الامانه دي كنت شغاله في حلتنا ببيع في الشارع بس اهل ابوي دايرين يعرسوني لي راجل كبير عشان كده هربتا قالو لي اهل امك وين قلت ليهم اهل امي جو يسوقوني اهل ابوي فتحو فيهم بلاغ والنيابه حزرتهم والحمد لله انا قدرت اتخطيت خطوه اني طلعت وتاني رزقي علي الله قالو لي افووو حرم ما تشيلي هم انتي واخوانك ضيوفنا وبيتنا مفتوح ليك قلت ليهم لا لا اعفوني انا مستحيل اقعد عند ناس م قصرتو انتو والله انا بشتغل وبدبرها قالو لي ي بتنا انتي غريبه ونحنا عندنا اخوات زيك بفرحو بيك والله قلت ليهم اعفوني بجد م بقدر وجزاكم الله الف خير قالو لي انتي معاك أطفال يعني ح تمشي وين قلت ليهم الله كريم برقد بيهم ف الجامع قالو لي ليه وبيوتنا فاضيه طيب ارح معانا حدي البيت وبنشوف ليك بيت فاضي وتاني اشتغلي وربي اخوانك وربنا يرزقك بس علي الطلاق م بنخليك براك انتي مسؤولينا قلت ليهم م بتقصرو والله جزاكم الله الف خير الاولاد نزلو بضاعتهم وحاسبو بتاع الدفار ياحليلو جا حلف علي واداني قروش قال لي تستاهلي اكتر بس انا محمول والله قلت ليهو م قصرت والله ربنا يرزقك بالحلال بقيت واقفه منتظره الاولاد خلصو وساقو معاي اخواني وودوني بيتهم هم طيبين واهلهم اطيب عليهم رحبو بي واكرموني بالضبايح وكل اهلهم جو سلمو علي ناس كريمين شديد ولمن عرفو اننا ايتام اي زول جاب لينا حاجه براهو والاولاد اسمهم مهند ومهيد قالو لي عندنا بيت خالنا جنبنا فاضي تقعدي فيهو وما تخافي نحنا هنا جنبك لو في اي شي نحنا بي سلاحنا بتلقينا في وشك قلت ليهم م بتقصرو وودوني البيت بيت سمح شديد ف الاحلام م كنت بحلم اسكن في بيت زي دا واتلمو فيني اهلو والجاب لي سرير والجاب لي لحاف والجاب لي عده والجاب لي ملايات ما قصرو معاي ابدا حدي الدولاب دا جابو لي انا بقيت محتاره فيهم معقوله في ناس بالشكل دا وبقيت اندب في حظي قلت يا ريتنا هربنا زمان بحياه امي ونادر هسي م كانت تكون المأسي دي حاصله علينا بس الحمد لله اخدو قسمتهم وبنات الحله جن نظفن معاي البيت ورتبنو وقالن لي بنجيك ان شالله وفاتو خلوني ونهاي م خوفتا عشيت اخواني وكنا تعبانين نومتا نومه عمري وحياتي ما نومتا واخواني فرحانين قالو لي نسيبه هنا احلي من الحله نحنا تاني م راجعين قلت ليهم مبسوطين قالو لي اي تاني م تودينا لي ابوي عشان يدقك وتموتي زي امي قلبي وجعني قلت ليهم لا لا دا ابونا م تقولو كده قالو لي ابونا بس بدقنا قلت ليهم معليش تكبرو تنسو ندي قالت لي انا م بنسا امي لمن ابوي ادقها انا بكرهو وم ماشه ليهو تاني ضميتا علي وكانت بتبكي قلت ليها م تفكري انا عايزاكم تفكرو في مستقبلكم تممام قالو لي اي سجلي لينا ف المدرسه قلت ليهم جدا
الدنيا كانت صباح قومتا اتسوكتا وصليت قلت لي اخواني انتو م صغار تاني ما انبهكم للصلاه تمام قالو لي تمام حسيت انهم مرتاحين شديد وانا زاتي مرتاحه زمان في بيتنا كانو قاعدين في نار ما بمر يوم وبنكون مرتاحين زي الراحه الضوقناها اليوم دا وكل م اتزكر امي م ارتاحت قلبي بوجعني شديد وحمدت الله اني هربتا وابوي ما وقعني في الراجل الكبير دا

 

 

عملت لي اخواني الشاي والبيت كان ملان حاجات اكل جابوهن لينا اهل مهند م قصرو معاي ابدا بس مصيرها تخلص رتبت المكان وعملت لي اكل وكنا مرتاحين راحه اخواني لمن مبسوطين قالو لي عايزين تلفزيون زي العند الناس القعدنا عندهم قلت ليهم ان شاء الله اشتغل اول حاجتين بجيبهم تلاجه وشاشه هسي انا همي في المدارس بتاعتكم وهمي في شغله اشتغلا بقيت افكر اشتغل شنو واعمل شنو بفكر كده سمعت صوت الباب دقا فتحتو لقيتا ام ناس مهند شايله لي فطورها قلت ليها يمه مالك تعبانه قالت لي ابدا ماف تعب وانا كده كده عملت الاكل اكلي اخوانك ديل ولو نامو تعالي اشربي ليك قهوه الليله عندي جمعيه النسوان بجني قلت ليها حاضر بجي اساعدك قالت لي بري والله انتي ضيفتنا ما بنتعبك ربنا اخليك لي اخوانك ديل والعليك م هين ربنا يقدرك امهم طيبه شديد وصغيره م كبيره ومهتمه بي نفسها ما زيي امي كانت شقيانا ربنا يرحمها
دخلت فطرت اخواني وقلت ليهم استحمووتعالو نومو بعد استحمو نومتهم ونومتا اختي الصغيره وهي طبعها حلو شديد نهاي م تعبتني ولا حسيت بيها قلت لي ندي اختي م تخافو مافي شي بجيكم والباب اقفلو عليكم بجوه نومو واشبعو نوم انا بشرب القهوه وبجيكم قالت لي سمح دخلت استحميت ولبست ومشيت انا خلقه الله سمحه بس م مهتمه بنفسي مشيت القهوه ولقيت النسوان مبالغه رسم وحنه ولون وونستهن كلها في نفسن وماف واحده شايله هم زي همي رجالن مريحنهن والراحه في وشهن ظاهره والشي الفهمتو منهن انهن محترمات رجالن وهم محترمنهن ومقدرنهن بعد كنت كرهانه العرس والرجال بسبب تجربه امي وكانت عندي فوبيا من الحاجه دي بس النسوان ديل اتمنيت اعرس راجل زي رجالن ديل يحترمني ويقدرني وانا ابدا م ح اقصر منو وبقن يسالن فيني حكيت ليهم انو امي وابوي متوفين وانا جيت هنا عشان اشتغل واحده فيهن قالت لي بتشتغلي شنو او وظيفتك شنو قلت ليها انا اي شي بشتغلو كنت ف الحله عندي صينيه ببيع فيها فول وتسالي والحمد لله رزقي كان سمح قالن لي ربنا يوفقك بتعرفي تكتبي وتقري قلت ليها طبعا انا كنت اولي الفصل بس الظروف خلتني اخلي قرايتي قالت لي حلو طيب انا عندي ليك وظيفه قلت ليها اها قالت لي نحنا عندنا مدرسه خاصه بس عايزين واحده تسجل لينا وما بنقصر منك وبنقري ليك اخوانك مجان رايك شنو قلت ليها م قصرتو والله جزاكم الله الف خير وموافقه انا المهم اكسب بالحلال قالت لي م عندك مشكله انتي اختي والمدرسه حقت راجلي م بقصر منك نهاي وشوفي متين فاضيه تعالي لي تمام انا فرحتا شديد وشكرتها اتفقت معاها اني اجيها تاني يوم وفعلا تاني يوم مشيت المدرسه والمدرسه كانت رهيبه والناس البقرو فيها احلي قالت لي اتفضلي عشان اعرفك علي الناس واوديك مكتب التسجيل مشيت معاها وعرفتني علي كل الناس ومن ضمنهم راجلها ولد شابه في شكلو اصغر منها وعاجباهو روحو اللبس كيف والعطر والنظاره زول بحب الحياه شكلو عرفتني عليهو ورحب ب قال لي ربنا يوفقك نحنا عندنا اهم شي الامانه قلت ليهو اكيد ومرت الايام ونزلت معاهم شغل وكانو بدوني راتب كنت م بحلم بيهو زاتو ونزلت اخواني معاهم وما شاء الله من اول فتره متفوقين وكنت مبسوطه شديد ومنال الشغلتني زاتا مبسوطه مني وبقت صاحبتي وبتحكي لي اي شي بس الشي المخوفني زوجها حسيت نظراتو لي غريبه والله يستر……….يتبع

 

 

 

• لقراءة باقي فصول الرواية أضغط على (رواية رغبة في الإنتقام)