رواية مغامرات عائلية الجزء الثاني الفصل الحادي عشر 11 بقلم همس كاتبة
رواية مغامرات عائلية الجزء الثاني الفصل الحادي عشر 11 بقلم همس كاتبة
لقراءة الرواية كاملة بدون إعلانات (اضغط هنا)
البارت الحادي عشر
بارت 11
سحر بسعادة : بابا ازيك .. اهلا و سهلا نورتنا .. اتفضل اتفضل
حضنها و تجاهل زمردة ثم اتجه ليسلم على عبد الله
عبد الله : اهلا يا توفيق البيت نور و الله
توفيق : منور بأهله … و الله ليك وحشة يا عبد الله
عدنان : ازيك يا عمي و ازاي فرنسا ؟
زمردة بمقاطعة : توفي انا عايزة ارجع البيت
تجاهلها و سلم على عدنان و اوس و تميم
توفيق و هو يحضن مصطفى : و الله و كبرتو يا عيال و بقيتو رجالة .. فين ابنك يا تميم ؟
تميم : فريدة هاتي آسر و تعالي سلمي على جدي
فارس بخفوت : يخربيت حلاوته انا راجل و اغرمت بيه
حلا : ده منظر حد يتقاله توفي ؟!
فارس بضحك : توفي بنكهة الكراميل
دينا بهمس : الراجل ده املنا الوحيد للخلاص من زيزي يا عيال
غادة : بجد لازم ياخدها و نرتاح احنا بقا … دي بهدلت المطبخ و البيت كله
لارا بسرحان : دلوقتي بس فهمت اوس منين جاب شياكته دي
كارما : ايه يختي ؟ هو ده كمان دخل قايمة كراشاتك ؟
لارا بضحكة : اه .. ده باين عليه معاه فلوس و زيزي عايزة تطلق يعني مفيش مانع لو دخلت حياته
كارما : انتي متخلفة على فكرة
لارا : انتي مش شايفة حلاوته ؟! شبه ياسر جلال في مسلسل رحيم
كارما : بس مش لدرجة انك تكراشي عليه يا بت .. عيب ده اكبر من جدو
لارا : تصدقي لو جاد الي قالت عليه زيزي طلع حلو كدة هتجوزه
كارما : انتي اصلا عايزة اي راجل و خلاص .. لغاية النهاردة مفيش راجل شوفتيه الا و عجبك حتى ناصر المعفن دخل دماغك
لارا بغضب : اخرسي ما تفكرينيش بالحكاية دي .. ربنا يحرقه
توفيق : ايه اخبار الغيط بتاعك يا عبد الله ؟
عبد الله : تمام و الله .. و العيال اليومين دول بيساعدو العمال بالشغل
تميم : قصده معاقبين يعني
توفيق بخبث : انت يا عبد الله رجعت للشقاوة بتاعة زمان و لا ايه ؟
عبد الله : ليه انا امته بطلتها ؟
توفيق : فاكر لما كنا بنهرب لغيط العزايزة و نستخبى من باباك ؟
عبد الله : دي كانت اياااام .. كنا بننزل عشان نستخبى من العقوبة و دايما عبد الرحمن كان هو الي بياكلها لوحده
توفيق : ربنا يرحمه .. ده كان بيشتغل كل حاجة لوحده و بعدها يتهزق برضو
زياد : يعني فكرة العقوبة دي ازلية و متوارثة بقا
عبد الله : طبعا .. احنا جيل بيسلم جيل .. بس عقوبة ابويا كانت شغل بجد مش زي الهطل الي بتعملوه ده
تميم : كل التعب ده و بالاخر تقول عليه هطل ؟!
عبد الله : ده تعب ؟ احنا في زمنا كان الواحد يشتغل من الساعة 4 الفجر لغاية 12 بالليل و ما كناش بنقول حاجة
توفيق : و الله و فكرتوني بايامنا الحلوة .. الجو ناقصه كوباية قهوة معملولة من البن المطحون ع الايد ده .. ايام امي و امك الله يرحمهم
عبد الله : زمردة هانم تعملهولك دلوقتي حالا .. سحر طلعي المطحنة القديمة و اديها شوية بن تطحنه و تعملنا قهوة
زمردة بغضب : توفي انت جيت ليه ؟
توفيق : الا اخبار شغلك ايه يا اوس ؟
اوس : الحمدلله ماشي كويس
توفيق : و شركة الالماني لسا بتحوم حواليك ؟
اوس : امممم و شكلهم كدة مش ناويين على خير
توفيق : قابلت نادر من فترة و قالي انهم لسا بيضغطو عليه عشان يتوسطلهم عندك و يشتغلو معاك
زمردة بصراخ : انا بتكلم معاك ليه بتتجاهل وجودي ؟!
توفيق : فين القهوة يا عبد الله ؟
سحر بهمس : امشي يماما اعمليله القهوة يمكن يحنلك
زمردة بغضب : ماشي … انا هوريكم
ذهبت مع سحر و هي تتمتم
توفيق بخبث : عبد الله لازم تزودلها العقوبة .. لسا عايزة تتزبط اكتر
عبد الله : احنا عايزين نخلص منها يا توفيق دي ما بترحمش و ممكن تموت الكل عادي
توفيق : لازم الاول تتربى على الي عملته ده .. دي فاكرة نفسها عيلة صغيرة و بتتنطط
فارس : بس صاروخ بنت الايه .. انا لو منك اجيلها راكع مش اتآمر عليها يا توفي
توفيق : اتلم يالا انت هتعاكس مراتي ؟!
فارس : دي هتخلعك يا توفي .. و اتجوزها انا بقى
خبطته حلا في بطنه و تألم اثرها
توفيق : جدعة .. خطيبته مش كدة ؟
حلا بابتسامة : ايوة يا .. توفي و لا جدو توفيق ؟
توفيق بضحكة : لا جدو توفيق احسن .. دي بنتك يا حسين ؟
حسين : ايوة .. دي الكبيرة
توفيق : طب يا بنتي اتلحلحي شوية و ازبطيلنا زيزي .. باين عليكي قوية و هتعرفي
حلا : حاولت .. بس و الله انا مليش غير بالضرب و دي ست كبيرة ما ينفعش اجيبها من شعرها بصراحة
توفيق : عبد الله سيبك من عقوبة العيال و ركز على زيزي اكتر .. سيبهم يساعدوك
تميم باندفاع : يا سلام عليك يا جدو .. هو ده الكلام ما تسمع منه يا بيدو
عبد الله : اتلم انت
اوس بقلق : حبيبة مالك ؟ انتي كويسة ؟
هزت رأسها بتعب
سعاد : ليه وشك اصفر ؟ انتي حاسة بحاجة ؟
حبيبة بتعب : دايخة و معدتي بتوجعني اوي
اوس : تعالي اوديكي الاوضة ترتاحي
خديجة بقلق : ليه دايخة ؟؟ مفيش دوخة بتيجي بنهاية الحمل يا سعاد
خولة : الدوخة من اعراض السحر
فريدة : ايه الكلام ده بس ؟ عادي في ستات بتفضل الدوخة معاهم لحد ما يولدو .. انا كنت كدة
حبيبة بوجع : ماما بطني بتوجعني اوي … مش قادرة
عبد الله : انتو بترغو و سابين البنت كدة ؟! ما تتصرفو
سعاد : تعالي يا حبيبتي لازم ترتاحي و لو الوجع زاد هنوديكي المستشفى
اخذها اوس لاوضتها و تبعته سعاد و خولة و حلا
غادة : معقولة حبيبة تولد النهاردة ؟!
فريدة : يمكن .. بس الطبيعي يعني انها تخلص الشهر التاسع .. تميم خد اسر هطلع اشوفها
دينا : استني انا جاية معاكي
اتت سحر و قالت : عمي .. ماما غشت و طحنت البن في الكبة بتاعة الملوخية … دي بهدلتها
فارس بضحك : ده انت يا توفي هتدوق قهوة بطعم الملوخية انما ايه
عبد الله : قوليلها تجيب المطحنة و تطحنهم هنا قدامنا يلا
سحر نظرت حولها باستغراب : حاضر .. في ايه مالكم يا بنات ؟
غادة : حبيبة تعبت و راحت لاوضتها
سحر بشهقة : تعبت ازاي ؟! .. خديجة خليكي مع ماما هطلع اشوف حبيبة مالها
خديجة : حاضر يا حبيبتي
********************
في اوضة حبيبة
سعاد : منين الوجع بالزبط ؟
حبيبة ببكاء : بطني من تحت بتخبط جامد .. و معدتي بوجع اوي
اوس : مش لازم نوديها المستشفى ؟ دي من الصبح تعبانة
فريدة : انا بقول نصبر شوية لغاية ما الطلق يزيد.. بالمستشفى هتفضل قاعدة و ممكن تتعب اكتر
سعاد : في وجع بضهرك يا حبيبة ؟
حبيبة بألم : لا .. بس بطني و معدتي .. مش قادرة يماما
فريدة باستغراب : ايه دخل المعدة بالطلق ؟؟
سعاد : مش عارفة يمكن البيبي بيضغط عليها
خولة : هاتي المصحف يا بت يا دينا .. هقرالها شوية قرآن يمكن تهدا شوية
دينا : حاضر
حلا بارتباك : انا هروح اعملها ليموناضة يمكن تخفف الوجع
خولة : لا .. معدتها بتوجعها .. اعمليلها كوباية نعناع
حلا : حاضر
خرجت تزامنا مع دخول سحر
سحر : مالها حبيبة يا سعاد ؟
سعاد : من الصبح و هيا تعبانة .. شكلها هتولد يا سحر
سحر : حبيبة الوجع بيجي و يروح و لا ثابت ؟
حبيبة : مش عارفة
سحر : طب عمال يزيد و لا يخف ؟
حبيبة : لا دلوقتي خف من ناحية بطني .. بس معدتي بتوجعني اوي
سحر باستغراب : و ايه علاقة المعدة بالطلق يا سعاد ؟؟ دي اكيد كلت حاجة عملتلها حموضة
حبيبة بتصوت مرهق : حاسة .. اني دايخة .. عايزة .. انام
اوس بتفكير : كلت حاجة ؟! .. اكيد كلت حاجة .. و ديني لو كنتي عاملاها يا زيزي لاوريكي
قام بسرعة و اتجه للاسفل
سحر بشهقة : معقولة ماما عملتها ؟!
فريدة : عملت ايه ؟!
سحر : يمكن حطتلها حاجة بالاكل .. هنزل الحق اوس خليكي جنبها يا سعاد
دلفت حلا و قالت : انا عملتلها النعناع اهو
سعاد : خلاص البنت راحت بالنوم
دينا بخوف : مش ممكن يكون اغمى عليها ؟
سعاد بغضب : كله من الست الي اسمها زمردة
فريدة : طنط لازم ناخد حبيبة للدكتور و نطمن على البيبي .. ممكن الساحرة دي تكون اذتها بجد
*******************
وصل اوس للحديقة و قال بحدة : تيتة انتي حطيتلها ايه بالمربى ؟
زمردة ببرود : ما حطيتش حاجة
اوس : طب ليه حبيبة تعبانة دلوقتي ؟! و ليه تعبت بعد ما اكلت من المربى على طول ؟
سحر : ماما قولي حطيتي ايه بالاكل ؟
زمردة : هحط ايه يعني ؟ دي كلها معلقة من الخلطة بتاعة الولادة و اهي هتولد الليلة و تفرحكم بالبيبي
سحر بشهقة : يعني انتي السبب بكل الي حصلها ده ؟!
زمردة : ده بدل ما تقوليلي كتر خيرك ؟!
اوس بغضب : على ايه ؟؟ ايه الجهل ده ؟ دي وحدة حامل حياتها مش لعبة بايدك عشان تجربي عليها خلطاتك
توفيق : انتي عايزة تولديها بالعافية يا زمردة ؟! افرضي حصلها حاجة هي و البيبي
زمردة : اخيرا اتكلمت معايا يا توفي
توفيق : شوفو الست .. انا بكلمك ع البنت و انتي دماغك بهبل الستات ده ؟!
سحر : و الله يماما لو حصلها حاجة عمري ما هكلمك .. دي مرات ابني و الي ببطنها حفيدي ليه تعملي بيها كدة ؟!!
زمردة : مش احسن ما تقعدلك سنة على ما تولد .. ده انا عايزة اساعدها
سحر : مهو مش بالعافية يماما
تميم : على فكرة انتي كدة بتأذيها مش بتساعديها .. البيبي مش زرار تضغطي عليه و ينزل لوحده .. هو لسا محتاج يكمل نموه جوا بطنها و لما يبقى جاهز ساعتها الجسم بيبتدي الطلق لوحده من غير وصفاتك العجيبة
زمردة : و النبي تنقطنا بسكاتك مش ناقصين كلام دكاترة مش فاهمين حاجة
سحر بقلق : تميم يعني دي مش ولادة ؟ ما نوديهاش المستشفى ؟
تميم : لا لا الحكاية مش مستاهلة .. كمان شوية هتخف و ترجع زي الفل
عبد الله بحزم : اوس اطلع خليك جنبها .. و انتي يا زمردة عقوبتك هتتضاعف عشان تحرمي تتصرفي من دماغك كدة
زمردة بصدمة : ده انا كنت عايزة مصلحتها .. توفي قولك كلمة انا مراتك
توفيق : و الله انا مش جاي عشانك .. احنا الي بينا انتهى .. انا جيت اشوف بنتي و احفادي
زمردة : يعني ايه الي بينا انتهى ؟!
توفيق : يعني ورقة طلاقك هتكون عندك بعد كام يوم
زمردة بدهشة : انت بتقول ايه ؟! عايز تطلقني بعد العمر ده يا توفي ؟
توفيق : ما تقوليش توفي دي تاني .. انتي الي طلبتي الطلاق بالاول … يبقى خلصت كدة
زمردة : توفي .. عشان خاطري ما تعملش كدة
عبد الله : انتي ما بتشتغليش ليه ؟ يلا خلصي الي بايدك بسرعة
*******************
دلف اوس اوضته هو و حبيبة
اوس : هيا نامت ؟!
سعاد : ايوة .. بس برضو بتتوجع كل شوية
اوس : لازم اخدها للدكتورة .. مينفعش نفضل نستنا كدة
دينا : هي زيزي فعلا طلعت حاطلها حاجة بالاكل ؟
اوس : اه قالت حطتلها وصفة تحفز الطلق
سعاد : على كدة ممكن تكون بتتطلق بجد
اوس : تميم قالي انه شوية وجع و هيروح لما ترتاح
خولة : و ممكن ما يروحش و البت تبقى بتولد بجد .. ده حصل مع سحر لما كانت حامل بمصطفى وقتها شربت من الوصفة دي و ولدت بنفس الليلة
سعاد : لا سحر ما كانتش بكرية يا خولة .. يعني ده طلق كداب زي الي حصل معايا و انا حامل بحلا يومها قعدت يومين بتوجع من غير ما اولد و بعدها باسبوع ولدتها
حلا : انتو هتقعدو تتكلمو على ذكرياتكم دي فوق دماغ البت ؟! لازم نسيبها ترتاح شوية
فريدة : صح و لو كانت هتولد عادي بتاخد وقت مش بثواني يعني
سعاد : طب امشو ننزل و خلي شخص واحد بس عندها
اوس : انزلو انتو انا هفضل جنبها
خرج جميعهم من الاوضة و بقي اوس يملس على شعر حبيبة برفق
بعد وقت قصير .. فتحت عيناها بتعب شديد
اوس : حبيبتي انتي كويسة ؟!
حبيبة بألم : معدتي بتوجعني اوي
قامت بسرعة و توجهت للمرحاض … خرجت بعد دقائق
اوس بقلق : انتي لسا تعبانة ؟
حبيبة ببكاء : عندي مغص مش قادرة
اوس : امشي معايا هاخدك للدكتورة
حبيبة بانهيار : ااااه .. عايزة ماامااااا .. روح اندهلها يا اوس همووت
فتحت دينا الباب بعنف و قالت بفزع : في ايه مالك ؟!
حبيبة : بطني بتوجع اوييي
دينا تناولت كوب النعناع و قالت : طب خودي اشربي دي يمكن ترتاحي
اوس : مش وقته .. امشي معايا هنروح للدكتور
*********************
في الاسفل
فارس بخبث : مزتي .. ما تجيبي بوسة
حلا بحدة : فارس اتلم مش وقتك خالص .. مش شايف البيت مقلوب ازاي
فارس بضحكة : و ايه الجديد ؟ ما طول عمره مقلوب
حلا بقلق : بس المرادي حبيبة الي تعبانة .. خايفة عليها اوي
فارس : كل ده من زيزي
حلا بغضب : و الله لاخزوقها و اعلمها الادب هتشوف
فارس : ايوة كدة هيا دي مزتي .. وحشتني بطولاتك يا عروسة
حلا : انت مبسوط ؟ مش على اساس بتحبها ؟
فارس : ما بحبش غيرك يا جميل
حلا بحدة : و الله لاوريك يا كلب .. كل ما تشوف مزة تريل عليها و قدامي كمان يا واطي ؟!
فارس : على الاقل مش بضحك عليكي زي غيري .. و بعدين دي ده مجرد ابداء رأي ما خونتكيش يعني
حلا : اممم ما دي اول طريق الخيانة يا معفن
فارس : دي نظرة عابرة يا مزتي .. مش زي بعض ناس بيسبو حبيباتهم كدة و يروحو لحضن غيرهم
حلا باستغراب : انت بتلقح على مين بكلامك ده ؟
فارس بخبث : لا و الله مش بلقح على حد .. بس الدنيا مليانة يعني
حلا : فارس اتكلم من غير لف و دوران .. مين الي بيخون حبيبته ده ؟!
فارس : هقولك .. اصلي سمعت جدو …
حلا بمقاطعة : ايه ده حبيبة انتي فوقتي ؟ رايحين على فين ؟
دينا : هنوديها للدكتور البنت تعبانة اوي
حلا بخوف : استنو جاية معاكم
خرجو جميعهم للخارج و كانت زمردة تطحن حبوب القهوة بينما الباقي يجلسون سويا
سعاد بشهقة : ايه الي قومك من سريرك يا بنتي انتي تعبانة
حبيبة بوجع : مش قادرة يماما
سعاد بغضب : انتي حطيتلها ايه بالزبط ؟
زمردة ببرود : ما تقلقيش مش هتموت .. يا دوبك شوية مغص و دوخة و بعدها تولد على طول
حلا بوعيد : اصبري بس هرجعلك .. اما نشوف مالها و هرجع اوريكي جناني على اصوله
سعاد : انتو رايحين للدكتور ؟
اوس : ايوة مش هسيبها كدة يعني
سعاد : طب استنا جاية معاكم .. دينا خليكي هنا مش هنروح كلنا
حسين : اما تكشف كلميني و قوليلي حصل ايه
سعاد : ماشي
******************
بعد وقت …. كانت قد ذهبت حبيبة الى الطبيب مع اوس و سعاد و حلا
سحر بقلق : اتأخرو اوي مش كدة ؟
عبد الله : معلش خير ان شاء الله
زمردة : عملت القهوة اهو
عبد الله : امم .. اتفضل يا توفيق
توفيق بخبث : عبد الله … عايز بصاره
عبدالله : انت تؤمر يا صاحبي … يلا يا زمردة هانم عايزين بصاره
زمردة بقرف : امبوسبيل .. اكيد مش هعمل القرف ده
عبد الله : هتعمليها … بسرعة بس
زمردة بصراخ : انا مش هستحمل افضل في البيت الغريب ده .. انا مش شغالة عندكم
عبد الله : طب اتفضلي الباب يفوت جمل
زمردة و هي تحرك يداها : و الله لامشي و ما تعرفولي طريق جرة .. انا هوريكم
مصطفى : لغاية دلوقتي ما شوفناش حاجة يا تيتة
زمردة بغضب : ماشي يا كلاب .. كلكو بقيتو تستقوو عليا ؟ انا هوريكم .. بقالي من الصبح بشتغل زي البهايم و محدش قال دي تيتة و كبيرة و عيب تشتغل .. اتفووووو
زياد : اعترفت انها كبيرة يا شباب
سحر : هتروحي فين يماما ؟ الدنيا ضلمة و مش هتلاقي مواصلات
زمردة : العيشة بالشارع اهون من البيت المعفن ده
خرجت من الباب و هي لا تزال ترتدي جلابيتها و تلف شعرها بنفس الوشاح
توفيق : ابعت حد وراها يا عبد الله .. يمكن تتوه و يحصلها حاجة لا سمح الله
عبد الله : ما تقلقش دلوقتي الغفر هيفضلو وراها لغاية ما تزهق و ترجع
تميم : ما كنت تاخدها يا جدو و ترجعو لفرنسا و نرتاح احنا بقا
توفيق : مش قبل ما تتعدل يا تميم و تبطل هبلها ده
بعد وقت دلف اوس و حبيبة و سعاد و حلا
عبد الله : حبيبة طمنينا عليكي اتحسنتي ؟
حبيبة : ايوة يا جدو الحمدلله بقيت كويسة
سعاد : الدكتورة قالت ان ده طلق كداب .. شوية انقباضات حصلت بسبب الوصفة الي خدتها و ادتها دوا يهديها
عبد الله : و البيبي كويس ؟
حبيبة : ايوة يا جدو ما تقلقش
دينا : طب قالتلك ايه سبب وجع المعدة ده ؟
سعاد : ده من الوصفة برضو .. ربنا يسامح الي كانت السبب
عبد الله : الحمدلله جات سليمة المرادي
دينا : اهي زيزي سابت البيت و طفشت مننا
اوس باستغراب : راحت فين ؟
تميم : معرفش خرجت
اوس بذهول : و سبتوها تخرج لوحدها و الدنيا نص ليل ؟!
يزن : ما تقلقش كلمت الرجالة و قولتلهم يفضلو وراها
عبد الله : لازم تحس ان مفيش حد جنبها عشان تعقل و ترجع لبيت جوزها و تتلم بقا
فارس : اسمعو منه جدو ده دماااغ .. بس يعني افرض يا توفي حد تحرش بيها بالليل هتعمل ايه
توفيق : بيقولك حط حراسة وراها و اتلم بقا ما تقولش الكلمة دي
ايهاب بحدة : بطل رخامة يا فارس و ما تتدخلش بغيرك
فارس بعبوس : حاضر يا هيبو
عبدالله : اوس خود مراتك ترتاح بعد الي حصلها ده
حبيبة : معلش يا جدو انا مش تعبانة هقعد معاكم شوية
بعد وقت ذهب جميع الكبار الى اوضهم و بقي الشباب في الحديقة عدا فارس الذي ذهب مع حلا للحديقة الخلفية
تميم بقلق : تيتة لغاية دلوقتي ما رجعتش يا شباب
يزن : ما تقلقش .. هيا دلوقتي بأمان
اوس : فين يعني ؟
يزن بضحكة : عندنا .. راحت لبيت ابويا
اوس : و ازاي عرفت البيت من بين كل البيوت دي ؟
يزن : كلمت اخويا اسلام و قولتله يعمل نفسه هيساعدها و هي ما صدقت و راحت معاه
تميم : يزن احترم نفسك .. ايه راحت معاه دي ما تزبط كدة
يزن : انت فهمت ايه يا غبي .. قصدي استضافها عندنا
اوس : طب كويس كدة اطمنت عليها
حبيبة : يعني هيا دلوقتي قاعدة مع مراتات باباك ؟
يزن بخبث : ايوة
دينا : و مالك بتتكلم كدة ؟ هو انت بتخطط لحاجة ؟
يزن : انا مليش دعوة جدك الي طلب كدة
دينا : طلب ايه ؟
يزن : قال لابويا يسلط مراتاته عليها .. و دول مفتريين يعني هترجعلنا مؤدبة
زياد : يوووه ده احنا ما صدقنا خلصنا
غادة : خلصتو من ايه ؟ مهيا لو راحت جدو هيفضالكم
زياد بتفكير : تصدقي عندك حق .. جدو موجه اهتمامه كله دلوقتي على زيزي
اتت كارما و قالت : انا عملت كريب .. حد عايز يدوق ؟
زياد : الله ده انتي بقتي شاطرة اوي يا كرملة
كارما بسعادة : و اتعلمت اعمل مكرونة بشاميل كمان .. مش كدة يا فريدة ؟
فريدة : صحيح .. بقت ست بيت شاطرة اوي
دينا : لا على كدة لازم نجيبلها عريس .. ما تيجي عندي و نبقى سلايف
كارما : لا انا عايزة اخلص منك اصلا
زياد : دينا اتلمي .. لسا بدري على الحكاية دي .. كرملة هتركز بدروسها و بس
لارا : على فكرة احنا كبرنا و ما بقناش اطفال عشان تعاملها كدة
غادة : لارا ما تتدخليش بين الاخوات
لارا : انتي مش شايفة بعاملها ازاااي ؟؟؟ ده فاكرها بيبي
زياد : و انتي مالك يا ام لسان و نص ؟ اختي الصغيرة و اعاملها زي ما انا عايز
كانت لارا سترد و لكن قاطعتها كارما
كارما : بس بقا انتو ما بتصدقو تتخانقو .. كفاية
اتت حلا و جلست على الارض بعنف و كان ورائها فارس
حبيبة : مالك يا حلا ؟ متنرفزة كدة ليه ؟
حلا بغضب : فريدة .. عايزين نلعب لعبة حلوة
فريدة : ما اخر مرة عملتو مشاكل و قولتو مملة
حلا : عايزين نلعب لعبة تانية
فريدة : لعبة ايه ؟ اشرحيهالنا الاول
حلا بخبث : هاتي جهاز كشف الكدب و هقولك ………
********************************
بارت 12
حلا بخبث : هاتي جهاز كشف الكدب و هقولك
فريدة : الله ازاي فاتتني دي .. هروح اجيبه حالا
ذهبت فريدة و نظرت حلا للشباب
حلا : اللعبة كالتالي … كل واحد هيحط ايده على الجهار و هنسأله اسئلة و هو يجاوب و الجهاز يقولنا لو صادق و لا كداب
تميم : بس الاجهزة دي مش دقيقة يعني
حلا : لا سمعت انها بتقدر تكشف الكدب بنسبة كويسة .. يعني اغلب اجاباتها بتبقى صحيحة … مش كدة يا حضابط ؟
يزن : تقريبا .. بس الاجهزة العادية دي عادة نسبة صحتها بتبقى اضعف
دينا بحماس : انت استعملته بالتحقيق قبل كدة ؟
يزن : لا .. بس كنت بسمع عنه
اتت فريدة و قالت : الجهاز اهو
حلا : حطيه على الطربيزة … هنبتدي بالشباب ايه رأيكم ؟
فارس : اشطا انا اول واحد
زياد : ايه الثقة دي ياض ؟! ده انت اكدب بني ادم عرفته بحياتي
حلا : حط ايدك يا فارس
فارس و هو يمد يده : اهو
حلا : هسأله انا … انت كنت فين النهاردة الصبح ؟
فارس : في الغيط
حلا : اشطا .. نفدت بجلدك
حبيبة : سؤال واحد بس ؟
حلا : ايوا ما احنا عددنا كبير .. حط ايدك يا اوس
اوس بضحكة : و الله ؟!
حلا : حبيبة جوزك شكله خايف من حاجة
حبيبة : اتلمي يا حلا .. اوس حط ايدك و وريها انك مستحيل تكدب
اوس : ماشي اهو
حلا بشر : عمرك خونت حبيبة يا اوس ؟
اوس : اكيد لا .. و لا عمري هعملها
حبيبة بسعادة : اهو الجهاز ما عملش حاجة
حلا بصدمة : ازااااي .. انت متأكد انه ما لسعكش ؟
اوس : ليه انتي عايزاني اكدب يعني ؟
حلا بنفاذ صبر : تميم حط ايدك
يزن باستغراب : مش دي المفروض لعبة ؟ انا ليه حاسس انك بتحققي معاهم ؟
حلا : ملكش دعوة .. لو رفضو تبقو خايفين من حاجة لتتعرف اعتبروه تحدي
تميم : و هنخاف من ايه يا هبلة .. اهو اتفضلي اسألي
حلا : تميم .. عمرك حضنت بنت غير فريدة ؟
تميم : اه .. امي و خالاتي كلهم و تيتة كمان
حلا بحدة : قصدي حضنت بنت عادية لا هي اختك و لا قريبتك
تميم : لا محصلش ابدا
فريدة : حلا انتي شاكة بحاجة ؟
حلا : لا .. زياد حط ايدك
زياد : اهو اتفضلي
حلا : زياد .. انت عمرك كلمت بنات على غادة ؟ يعني خونتها ؟
زياد : لا
حلا بغضب : الجهاز ده اكيد بايظ .. مستحيل كلهم يجاوبو صح
دينا : طب اجرب انا .. اسأليني يلا
حلا : دينا انتي عمرك خرجتي مع يزن من غير علم مامتك ؟
دينا : لا … اااعااااااا دي لسعتني
يزن بضحك : تستاهلي يا كدابة
حلا بتفكير : اهو اشتغل .. اكيد في حاجة غلط
اوس : انتي عايزة توصلي لايه يا حلا ؟
حلا : مفيش .. هروح انام
لارا : هي دي اللعبة بتاعتك ؟!
حلا : مهو مش شغال كويس .. خلاص المرة الجاية نبقى نجيب واحد جديد احسن
حبيبة لأوس : الوقت اتأخر لازم ننام
اوس : يلا يا حبيبتي
زياد : و انتو كمان يا بنات قومو نامو وراكم شغل كتير بكرا
كارما : تصبحو على خير
ذهب جميعهم للداخل عدا زياد و فارس
زياد : فارس استنا
فارس : في ايه ؟
زياد : انت عرفت ليه متعاقبين مش كدة ؟
فارس : لا ابدا
زياد : فارس ما تحورش عليا انا عارفك .. انت كنت ورا الباب و سمعت جدو بيكلمنا مش كدة ؟
فارس بخبث : بصراحة اه
زياد بصدمة : و قولت لحلا ؟!!!!
فارس : اه برضو .. هيا الي زحلقتني بالكلام
زياد بغضب : يخربيتك .. دلوقتي هتفضحنا يا زفت
فارس : لا اطمن .. حلا ما بتخرجش اسرارنا برا الحدود المصرية
زياد: انت حمار يا ابني ؟! بيتي هيتخرب على ايدك يا غبي .. دلوقتي ايه الي هيقنع غادة اني مظلوم ؟!
فارس بخبث : عشان تتعلم تلعب بديلك من غيري يا واطي .. لو اخدتني معاك مكنتش هقول حاجة .. باي زيزو
قام فارس و ذهب للداخل بينما زياد ينظر امامه و يفكر
********************
في اليوم التالي
دلفت حلا اوضة حبيبة بعد نزول اوس للاسفل
حلا : حبيبة .. حبيبة قومي
حبيبة بصوت ناعس : في ايه ؟
حلا : اني نايمة و مستريحة و المية بتمشي من تحتك يا هبلة
حبيبة باستغراب : ايه الكلام ده ع الصبح ؟ .. في ايه يا حلا ما تصلي على النبي
حلا : عليه الصلاة و السلام .. قومي يختي قومي عايزة اكلمك بحاجة
حبيبة : طب سيبني افوق شوية و بعدها نتكلم
حلا : مستنياكي باوضة غادة .. تعالي بسرعة قبل ما جدو ينده علينا .. ما تتاخريش
حبيبة : حاضر
بعد وقت قصير ذهبت حبيبة الى اوضة غادة
حبيبة : صباح الخير
فريدة : صباح النور .. اهو التمينا يا حلا في ايه ؟
حلا : عندي خبر مش كويس .. بس لازم اقوله عشان تفوقو
غادة : الي هوا ايه ؟
حلا : جوازاتكم بيخونوكم
حبيبة بضحك : ايه الكلام الاهبل ده يا حلا ؟
فريدة : ده الي جمعتينا عشانه ؟ فعلا هبلة
حلا : و الله العظيم ما بكدب .. و معايا الدليل على الفلاشة دي اهو
غادة : انتي مصوراهم كمان ؟ مش حرام عليكي ؟ ده تجسس يا حلا و كدة هتأثمي
حلا : مش انا الي صورتهم دي وصلتني امبارح .. شوفو عليها ايه و احكمو
فتحت حلا اللابتوب و عرضت ثلاث صور لزياد و اوس و تميم و هم يحتضنون الراقصة في بيت هشام صديقهم
فريدة بذهول : ايه ده ؟! مستحيل اكيد فتوشوب
حلا : لا حقيقة و انا ممكن اخلي فارس يكلم الراجل و يأكدلك كلامي
غادة : مستحيييل .. زياد مش بيروح الاماكن دي ابدا
فريدة : فعلا زياد ملهوش بالكلام ده و لا تميم و لا حتى اوس
حلا : حبيبة مالك ؟
حبيبة بصدمة : اوس اكيد مش هيخوني يا حلا .. مستحيل .. ما تلعبيش بدماغي تاني ارجوكي
حلا : و الصور دي ايه مثلا ؟ الكلام ده حصل يوما روحنا للست الدجالة يا حبيبة و اوس يومها ما ردش على مكالماتك عشان كان في حضنها
حبيبة بانهيار : ما تقوليش كدة .. مستحيييل
غادة : حبيبة ما ترديش عليها .. احسني الظن بيهم .. اكيد ده حد عايز يورطهم
حلا : و الله انا ممكن اجيب البنت الي بالصورة و اثبتلكم كلامي .. خصوصا ان هما التلاتة معاقبين … تفتكرو ليه ؟
فريدة بدهشة : يعني جدو عارف و ساكت ؟
حلا : ايوة و عشان كدة عاقبهم هما التلاتة
غادة : يعني الحكاية بجد ؟!
حلا : الظاهر كدة .. انزلو اسألو جدو لو عايزين
حبيبة : اوس مستحيل يخوني … لا لا .. مش ممكن يحصل ابدا
حلا : البت دي هتنقطني .. كام مرة قولتلك ما تحطيش ثقتك براجل ؟! دول كلهم كدة يا هبلة
حبيبة : مش هصدقك .. ما تضحكيش عليا زي كل مرة يا حلا .. انا مش ناقصة مشاكل ارحميني
حلا بغضب : انتي الي لازم ترحمينا يختي .. هو الحمل ده اثر على دماغك و لا ايه ؟! بقولك جوزك بيخونك و انتي زي الهبلة ماشية وراه
فريدة بغضب : و الله لانفخك يا تميم
خرجت فريدة من الاوضة
حلا : يا بنات ما تتنازلوش عن حقوقكم .. لازم تعاقبوهم عقوبة كبيرة
غادة بضيق : حلا اتلمي مش ناقصنا تحريض .. حبيبة روحي كلمي اوس و انا هكلم زياد و نفهم منهم بقا
حلا : غبية .. دلوقتي هيضحكو عليكو بكلمتين و انتو هتصدقوهم .. لو ما غلطوش ما كانوش اتعابو يا هبلة انتي و هيا
غادة : بس لازم نديهم فرصة و نسمعهم و لو كدبو ده بيبقى بينهم و بين ربنا .. بس مش هقبل اخد اثم سوء الظن بالناس
حلا : شوفو مين بيتكلم .. متأكدة انك غادة يا بت ؟
غادة : الكلام معاكي مفيش منه فايدة .. انا هروح اكلم زياد
خرجت غادة و بقيت حبيبة امام حلا
حلا : لو روحتي كلمتيه هجيبك من شعرك
حبيبة : ما تكبريهاش بدماغي يا حلا .. اوس مستحيل يخوني .. و حتى امبارح لما سألتيه و جاوب .. الجهاز معملش حاجة يعني هو بيقول الحقيقة
دلفت دينا و قالت باندفاع : ايه الكلام الي سمعته ده ؟!!!
حلا : سمعتي ايه ؟
دينا : انتي ايه الي قولتيه لغادة و فريدة ؟ دول الاتنين خرجو بيعيطو
حلا : زياد و تميم و اوس كانو بحضن رقاصة من يومين و اهي الصور شوفي كدة
دينا : و انتي مااالك ؟ ايه الي حشرك بالنص ؟! دي حياتهم سيبهم بحالهم بقا
حلا : و الله دي تبقى اختي و دول صحابي مش هقبل ان جوازاتهم يخونوهم و اسكت
دينا : انتي كدة خربتي تلات بيوت يا متخلفة .. و الله جدو لما يعرف ليهزقك و يعاقبك لوحدك
خرجت حبيبة من الاوضة
حلا : سيبيهم يتعلمو ان الرجالة ملهمش امان
دينا : انتي مالك بيهم ؟ زودتي مشاكل البيت و احنا مش ناقصين .. افرضي اتخانقو بجد ؟
حلا : ليه هما كانو عايزين يتخانقو هزار ؟ دينا انا ما اسمحش ان ست تتهان و يتقل منها كدة .. مش هقبل لوحدة تتخدع و انا اعرف الحقيقة و اسكت
دينا : مش وقت حقوق مرأة دلوقتي .. الكلام ده تقوليه للجمعية بتاعتك مش هنا .. كل حاجة ليها حدود يا حلا .. انتي كدة عملتي فتنة بينهم و هتخربي بيوتهم
*****************
في الغيط
فريدة بصراخ : يعني روحت للمكان ده
تميم : ايوة روحت بس ما كنتش عارف انه هيحصل كدة
فريدة بغضب شديد : بس حضنت الرقاصة
تميم : فريدة اهدي الحكاية مش زي ما انتي فاهمة .. هشام شربني حاجة كدة و بعدها ما حسيتش بنفسي
فريدة بصدمة : يعني اييه ؟! حصل بينك و بينها حاجة ؟
تميم : يخربيتك لا طبعا … انا بس معرفتش اروح لوحدي و زياد سندني لغاية البيت .. اسأليه لو مش مصدقاني
فريدة : و رحمة امي يا تميم لو طلع الكلام ده كدب لادفنك هنا … زيااااااد
اتى زياد بسرعة و قال : في ايه ؟؟
فريدة : تميم عمل ايه مع الرقاصة ؟؟
زياد : ايه ده هيا حلا قالتلك ؟ غادة عندها علم ؟
فريدة : رد على قد السؤال .. تميم كان بيعمل ايه هناك
زياد : و المصحف ما لحق يعمل حاجة .. احنا خرجنا على طول اول ما شوفناها
فريدة : و ليه جدو معاقبكم ؟!
كان زياد سيرد لكم لمح غادة قادمة اليه
زياد : استر يا رب
غادة : زياد ممكن نتكلم على جنب شوية
زياد بتوتر : اه طبعا .. اتفضلي يا حبيبتي
ذهب معها و بقيت فريدة تضع يداها على خصرها و تنظر الى تميم
تميم : اهو اخوكي ذات نفسه قالك اني بريء .. ما تكبريش الحكاية بقا
فريدة بغضب : ليه جدو عاقبكم ؟
تميم : جدو بيتلكك عايز يعاقبنا و خلاص يا فريدة .. انتي عايزة تعمليها خناقة ؟
فريدة بتهديد : انا هكلم مرات هشام و اعرف منها
تميم بحدة : لا كدة انتي زودتيها اوي .. بقالي ساعة بقولك معملتش حاجة .. انتي المفروض تكوني متأكدة اني مستحيل اعمل كدة
فريدة : اتعصب اتعصب .. غلطان و بتتعصب عليا كمان ؟! ده بدل ما تطمني و تقولي حقك عليا ؟
تميم : قولت معملتش حاجة غلط يبقى تصدقي من غير افورة .. لمي الحكاية يا فريدة انا مش ناقص
فريدة بغضب : ماشي يا تميم
تركته و ذهبت
غادة : انت روحت للمكان ده بجد يا زياد ؟!
زياد : ايوة روحت .. بس اسمعني لو سمحتي .. انا روحت على اساس عزومة عادية قعدة رجالة كدة مكنتش اعرف ان هشام هيزودها كدة
غادة : و ازاي قدر يصورك مع الرقاصة ؟
زياد : هي قربت مني بسرعة و انا زقيتها على طول و لو مش مصدقاني اسألي اوس و تميم
غادة : مصدقاك .. بس لازم قولتلي من الاول
زياد : اقسم بالله كنت عايز اقولك بس جدو حذرنا لو فتحنا بوقنا هيمرمطنا .. كان خايف تحصل مشكلة و اهي حصلت
غادة : عشان كدة بيعاقبكم ؟
زياد : قصدك واخدها حجة عشان يعاقبنا .. مش عارف ازاي هشام الكلب قدر يضحك علينا كدة و يصورنا و يبعت الصور لجدو
غادة : و ايه مصلحته من الي عمله ده ؟
زياد : هشام بيغير مننا يا غادة .. ده بني ادم فاشل معرفش يعمل حاجة .. و من ايام الجامعة همه الوحيد هو الستات و بس
غادة : طب خلاص ما تتكلمش عليه .. بس اوعدني انك مش هتكررها تاني
زياد : هكون غبي لو كررتها .. ابوس ايدك ما تزعليش و الله ما استحمل زعلك
غادة بابتسامة : مش زعلانة منك يا حبيبي
زياد : يلهوي بتقوليلي حبيبي .. لا على كدة تعالي نكمل كلامنها تحت الشجرة الي هناك
غادة : اتلم و بطل قلة ادب .. ارجع لشغلك يلا
زياد بعبوس : ليه ما انتي كنتي مطريها دلوقتي ايه الي حصل
غادة : بس يا زياد .. يلا امشيي
توجهت دينا الى يزن و جلست بجانبه
دينا : مولعتش بينهم
يزن : ليه انتي عايزاها تولع ؟!
دينا : لا .. بس توقعت البت غادة تعملنا شوية دراما .. البت دي كانت دراما كوين قبل كام شهر بس
يزن : و ايه حصل دلوقتي ؟
دينا : بقت هادية اوي و عاقلة .. الحمدلله اني خلصت من قرفهم
يزن : دينا .. ما تيجي نزوغ شوية وسط الدراما دي
دينا بضحك : دلوقتي حبيبة هتعمل مسلسل انما ايه .. مع هرموناتها دي تبقى كملت
يزن : كويس يعني فرصة نهرب
دينا : و لو جدو كشفنا ؟
يزن : نقوله كنا بنطمن على زيزي .. امشي يلا
دينا : على فين ؟
يزن : نتمشى شوية هناك اهو نغير المود ده
دينا : اشطا يلا بينا
**********************
دلفت فريدة اوضة حبيبة وجدتها منكمشة على نفسها و تبكي
فريدة بغضب : انتي هتفضلي تعيطي كدة ؟ لازم نعمل حاجة
حبيبة : اعمل ايه ؟ مستنية اوس يجي عشان اكلمه
فريدة : و افرضي كان بيكدب ؟
حبيبة : اوس مش بيكدب عليا
فريدة بتفكير : و لا تميم .. مش من عوايده يكدب يعني .. منك لله يا حلا كبرتي الحكاية بدماغي
حبيبة : انتي اتخانقتي معاه ؟
فريدة : تقريبا .. بس مش عارفة هتأكد ازاي .. لازم اتأكد و اتطمن .. لا لا انا هكلم مرات هشام و اسألها
حبيبة : انتي اتجننتي ؟ عايزة تباني قدام الكل انك مش واثقة بجوزك ؟ تميم مستحيل يخونك اكيد في حاجة غلط
فريدة : لو كان كلامك صح يبقى ليه جدو بيعاقبهم ؟! انا هتجنن
حبيبة : لو هما عملو كدة بجد كان زمانه جدو بهدلهم جامد زي المرة الي فاتت .. دول بصو علينا من الباب و جدو مرمطهم بالارض ما بالك لو بيروحو الاماكن المشبو..هة دي
فريدة بتفكير : صح جدو كان بيعامل تميم كويس و ده غريب لانه عادة بالعقوبة بيفضل يهزقه .. انتي من امته ذكية كدة يا بت ؟!
حبيبة : فريدة اطلعي برا انا مش ناقصاكي
فريدة : طب ليه بتعيطي طالما واثقة بأوس كدة ؟!
حبيبة ببكاء : مش عارفة .. حاسة اني نفسي اعيط و خلاص
فريدة : اه دي هرمونات بقا .. بس خودي بالك ممكن تأثر ع البيبي
حبيبة بخوف : ازاي يعني ؟!
فريدة : بيقولو لما الام تعيط البيبي بيحس بيها و ممكن يطلع زنان و يفضل يحزق
حبيبة : لا لا مش عايزة اعيط .. انا اصلا متأكدة أوس مستحيل يخوني و لا يبص لغيري
فريدة : ياه ع الحمل و قرفه .. اخر شهر بتحسيه سنة مش شهر حمل
دلف اوس الاوضة و قال : فريدة لو سمحتي ممكن تسيبنا لوحدنا
فريدة : اوك عن اذنكم
خرجت فريدة و بقي اوس ينظر لحبيبة
حبيبة : في ايه ؟
اوس : و بعدين مع اختك دي ؟ مش ناوية تسيبنا بحالنا بقا ؟
حبيبة : هيا خايفة عليا ..
اوس بمقاطعة : حفظتها .. الاسطوانة دي حفظتها كويس .. بس مش لدرجة انها تتدخل بحياتنا .. دي مش اول مرة تسخنك عليا و طول فترة حملك كان بتستقصد تبعدك عني
حبيبة : كفاية يا اوس مش عايزة اسمع .. و الله انا قرفانة من غير تدخلات حلا
جلس بجانبها و قال باستغراب : مالك ؟ انتي مش على بعضك ليه ؟
حبيبة بضيق : مش عارفة .. حاسة اني مش طايقة حاجة .. ما تيجي نخرج شوية
اوس بابتسامة : ايوة كدة .. دلوقتي هخرجك و نغير جو .. بس مش غريبة يعني مفتحتيش معايا تحقيق على حكاية الصورة ؟
حبيبة : هنتكلم بالموضوع ده برا .. انا هقوم البس
اوس : طب يلا مستنيكي
حبيبة : اه صحيح ازاي هتخرج و جدو معاقبك ؟
اوس : معلش .. جدي مش هيقول حاجة طالما الخروجة عشان خاطرك
******************
مر بعض الوقت و اجتمعو على طاولة الغداء عدا اوس و حبيبة الذين خرجو من وقت قصير
توفيق : اخبار زيزي ايه يا يزن ؟
يزن : كلمت ابويا و قالي انها كويسة
عبد الله : و عملو الي اتفقنا عليه و لا لا ؟
يزن : بصراحة لا .. اهلي مش موافقين
عبد الله باستغراب : ليه ؟
يزن : يعني عشان العادات عندنا حضرتك عارف انها ضيفة .. ابويا قال لو فضلت عندنا اكتر عن تلات ايام يبقى تمام هيمشي على الاتفاق
توفيق : تلات ايام ؟! انا لازم اسافر بكرا يا عبد الله .. مش عايز اسافر من غيرها
تميم : يبقى خلاص روح خودها و سافرو عشان خاطري دي كلت دماغي
توفيق : هو كدة .. خلاص يا عبد الله كفاية عليها اليومين الي فاتو
فريدة بخبث : و الله هتوحشنا زيزي هانم
زمردة بغضب : وحش اما يلهفك يا بتاعة الاعمال
التفت جمعيهم اليها و نظروا بصدمة
توفيق : انتي مش قولتي مش هنعرفلك طريق و شوحتي بايديكي كدة ؟!
زمردة : توفي كفاية مسخرة انا عايزة امشي من هنا و ارجع لبيتي ………….. يتبع
مغامرات عائلية
- لقراءة باقي فصول الرواية أضغط على (رواية مغامرات عائلية)