رواية إعتزال الفصل الأول 1 بقلم سبأ النيل
لو عاوز تقرأ الفصول الجديدة من الرواية دي بشكل حصري قبل صدورها
أنضم لقناتنا على تليجرام (من هنا)
رواية إعتزال الفصل الأول 1 بقلم سبأ النيل
البارت الأول
اتخلعت شديد وجسمي اترعش لمن ابوي فتح باب الدكان وجا داخل وحتى هو اتخلع .. عاين لي بإستغراب شديد بعد ما عرف انو دة انا وقالي عمر؟ .. جيت متين يا ولد .. سألني وهو بفتح في باب الدكان للاخر وبثبتو بالطوبة بي رجلو .. ومالك تاكي الباب دة كدة؟! ..
ما لمحتك في الجامع .. رديت عليهو بي صوت راجف بحاول على قدر الامكان ابين انو طبيعي وانا بدخل في ربطة القروش في جيب بنطلوني الورا .. وقلت ليهو اي طلعت من الجامع طوالي عشان الحق افتح الدكان .. لمن فتحت الباب كدة سمعت صوت من جوة ياهو جيت اشوفو لقيتها كديسة .. قالي اي في قد بالسايد التاني للدكان دة طوالي بدخلو منو بعد اودي القروش للراجل دة يجي يصلحو ..
فتح درج القروش الشلت منو وبقا بطلع في الربط كدة انا جسمي كشا وبديت اعرق خفتو يعرف انو في قروش ناااقصة .. بقيت بعاين ليهو بي توتر وهو بحسب في القروش .. مسك ربطتين حسبهم كدة ووقف لحظة وهو بفكر .. قلبي بدأ يدق .. قلبهم كدة وكدة وشال من الربطة التالتة حبة قروش تماهم بيها وقالي عمر .. انا بي شوية اطمئنان قلت ليهو اي يا ابوي .. قبل علي مدا لي القروش وقالي هاك ودي القروش دي لي عمك حامد وقوليهو اعفا لينا اتاخرنا عليك .. شلتهم منو وقلت ليهو طيب ..
طلعت وديت للراجل القروش وغشيت محل التمباك (الصعود) جبت لي اربعة اكياس ومهنا مشيت للشباب .. قعدنا في مصطبة بيت سمح كدة من بيوت الحلة عندو شجر ومزيرة كدة .. قعدنا نتونس ومرة نلعب اقيام بالتلفون ومرة مشاغل بنات الناس .. قالو لي الليلة ما جبت لينا قروش من دكان الحاج ولا شنو .. قلت ليهم معقولة بس .. طلعت الربطة كدة بدو يصفرو … والله انت شفت واصلي عديل يا عمر .. بالله اسي دي كم .. اسمع ديني قروش يا مان لغاية ما اجمرك لي قروش من حتة ..
والزمن مر بالطريقة دي لغاية ما زمن الفطور جا .. مشيت الدكان لي ابوي لقيتو طلع الفول والزبادي والطحنية لمن شافني جيت قالي تعال جهز الفطور دة عشان نمشي الجامع … صلحت الفول وجهزت باقي الفطور فطرنا وبعد خلصنا قفلنا الدكان ومشينا الجامع … بالعصرية كدة مشت الكورة مع الشباب وعزيتهم بي بارد من القروش الشلتها ..
وهم ما صدقو قعدو يكسرو لي تلج .. طبعا انا بحس بالعظمة شديد وانا بسمع كلمات الاطراء منهم ودة تقريبا الشي البخليني كل مرة اشوف لي اي طريقة تسمعني كلام سمح منهم .. اجازف لي قروش او اجيب ارقام بنات او اشتري ليهم معاي تمباك او سجاير .. لغاية ما جا اليوم الجاط لي حياتي كلها فجاة..
يُتبع …
- لقراءة باقي فصول الرواية أضغط على (رواية إعتزال)
لو عاوز تقرأ الفصول الجديدة من الرواية دي بشكل حصري قبل صدورها
أنضم لقناتنا على تليجرام (من هنا)