رواية أسود في أسود الفصل الأول 1 بقلم أحمد سعد
رواية أسود في أسود الفصل الأول 1 بقلم أحمد سعد
البارت الأول
= ممكن أفهم وأعرف انت جاي تخطبني بناءاً علي ايه .؟
_ ولا حاجه انا لقيتك قربتي تعنسي قولت اجي ارأف بحالك بدل مانتي محدش يعرفك ولا معبرك كده !
= تخرج حالا من هنا ومالمحش وشك هنا تاني .. وتقولهم انك مارتاحتش ومش هتكمل الخطوبه دي . عشان لو انا اللي رفضت بابا هيبهدلني ..
_ هاتي تمن الجاتوه الاول دنا جايبه ب 700 جنيه ده ..
= 700 عففريت ينططوك . هما 200 جنيه مافيش غيرهم .. انا عارفه طلعتلي من أنهي داهيه ولا شوفتني فين انت .!
_ فِكرك عشان منقبه يعني محدش هيعرفك .. كلها عارفه بعضيها .. وبعدين ال 200 دي ماتجيش تمن سندويتش الشاورما اللي انا باكله ده ..
= يعني جاي تخطب وجايب معاك سندويتش شاورما تطفحه وانت قاعد مع اللي هتخطبها ..انت يابني مجنون ولا خالك راجل أهبل .؟
_ ده رد منقبين ده .؟ المفروض انك ملتزمه ورقيقه كده وماترفعيش عينك ف عين حد .. وبعدين ماترفعي النقاب صحيح .. خليني اشوف وشك المنيل ده
= لما تشوف حلمة ودنك ان شاء الله .. وبعدين انا منتقبه .مش منقبه ..
_ ياستي منتقبه من منقبه مافرقتش هو حرف واحد .. وبععدين انا هفهمك .. انا لقيت ابوك بيدورلك ع عريس ف كل مكان وعرفت ان محدش بيرضي بيك قولت اجي استغل الموقف واتدبس التدبيسه السوده دي ..مش من جمالك يعني بعد الشر .لا لاني كنت عاوز اتجوز واحده منقبه .. خطبت كتير قبل كده ومحصلش نصيب
= وهي دي سِحنه حد يكمل معاها ..؟ دا ربنا نجدهم ..
_ اسم الله علي سِحنتك .
= وانت يعني شوفتني ..؟
_ مش محتاج اشوفك .عينك اهي باينه شكلك حوله
= ( رفعت النقاب وكانت كالبدر في ليلة تمامه ) هوريك عشان حقك شرعا تشوفني ..ها ايه رأيك ياللي عايز تتهزق ..؟
_ ياساتر يارب نزلي النقاب تاني نزليه .. دا النقاب شايل ومخبي … ع العموم كويس اني شوفتك عشان اخلع م الجوازه دي بدون ما احس بالذنب ..هاتي ال 200 جنيه هااتيها اسيبهالكو ع الصينيه عشان يعرفو اني انا اللي مش موافق ..
= واشمعني 200 جنيه ..؟
_ ماهو العرف هنا ف منطقتنا اني لما اشوف العروسه وتعجبني اسيب 1000 جنيه ع الصنيه وامشي واهلك هيفهمو .. ولو معجبتنيش هسيب 200 جنيه بس .. ف انا هسيب ال 200 دي عشان يعرفو ان انا اللي رافض عشان ابوكي ياستي مايزعلكيش ولا يضايقك .. عملت كده معاكي واجب صح .؟
= بصراحه صح .. ومتشكره جدا ..اتفضل اهي 200 جنيه
_ يلا عن اذنك .. كنت هتدبس الحمد لله ربنا ستر
( بعد شويه )
_ خدي يابنت .. ايه رأيك ف العريس
= هو كويس .. بس هو اللي حسيته مش مهتم او كان بيدور علي واحده تانيه ع ذوقه … كويس انه هو اللي رفض عشان حضرتك ماتقولش اني بطفش اي حد يتقدم
_ يطفش ازاي ..الولد ساب 10 الف جنيه ع الصينيه وقالي مستني رأيكو عشان نيجي نفرا الفاتحه وانا قولتله ييجي يوم الجمعه .. ع العموم كويس انك موافقه الحمد لله .. زغرطي يا حاجه زغرطي بنتك اخيرا هتتخطب وتهوينا شويه
= ( ف سرها )
يابن الجززززززمه
- لقراءة باقي فصول الرواية أضغط على (رواية أسود في أسود)