رواية أحببت وأنا على ذمة رجل اخر الفصل الحادي عشر 11 بقلم نوسة حمد

رواية أحببت وأنا على ذمة رجل اخر الفصل الحادي عشر 11 بقلم نوسة حمد

 

 

البارت الحادي عشر

 

#احببت_وانا_علي_ذمه_اخر11
#نوسه_حمد
الولد القلت ليهو هكر لي الصفحه واحذف المنشور اتصل علي قال لي نوسه قدرت هكرت الصفحه وعرفت البت المنزله المنشور وهكرت صفحتها دي زوجه خالد مديرنا ف الشغل يعني انتي كانت عندك علاقه مع خالد قلت ليهو يا رامي والله ما لي الدرجه دي انا منتظره فادي يجيب الدردشات من الاول للآخر عشان تشوف مالي لي درجه المنشور المنزل والفضيحه الانفضحتها وخالد زاتو كان مضايق وزوجتو هي السبب وهسي عامله فيها عاوزه تفضحني وتشهر بي م عايزه اقول ليك كان تلم راجلها عليها حتي تتفاصح بس لمتو ولا ما لمتو انا م من حقي اتونس معاهو وانا عارفه اني غلطانه بس يا رامي خالد هو الحاول يقرب مني انا كان عندي مشاكل مع زوجي وقصص كتيره وكنت ح اموت لانو زوجي ظلمني وما تعتبر كلامي ليك تبرير لا دي الحقيقه خلي فادي يعمل لي استرداد للدردشه وح تفهم اي شي قال لي نوسه انا واالله واثق فيك شديد ما شفت منك غير الاحترام حتي لو غلطتي الشيطان شاطر ولازم تتعلمي من غلطك وبتمني علاقتك م تكون اتوترت مع زوجك قلت ليهو يلا سبحان الله انا علاقتي كانت متوتره قبل اتكلم مع خالد وزوجي كان هاجرني بدون سبب وعمري م غلطت في حقو بالعكس انا مديت يدي ليهو بس ظلمني وكنت قاعده معاهو في بيت واحد وسلام الله م بيني وبينو وكان بعاملني معامله اليهود والله لو غلطتا في حقو او قصرتا بعزرو بس والله يا رامي انظلمتا والواحده لمن تقفل من راجلها بتبقا ضعيفه جدا قدام اي كلمه تتقال ليها من اي راجل حتي لو ف الشارع و خالد كان مضغوط في حياتو حبا يحكي لي اشيل همو ويشيل همي وساعدني شيلت حقي من راجلي وحصل الحصل رامي قال لي عبله دي منو انخلعت قلت ليهو عبله عرفتها من وين قال لي عبله علاقتك بيها شنو قلت ليهو عبله دي صديقه عمري الغدرت بي واتزوجت راجلي من وراي وهي سبب في هجران طارق لي غدرت بي وطعنتني في ضهري مالا انت بتسال منها قال لي انا لمن هكرت صفحت مي زوجه خالد وما عايزها تحس اني هكرتها المهم هي شكلها م بتفتح الرسايل المرسله كتير ف اثناء انا م بفتش عشان اعرف مي دي منو جاني طلب مراسله من واحده اسمها عبله شكلها شافت المنشور ودخلت عليها وكاتبه ليها انا ضرت الناشره صورتها وتعال نخت يدنا في يد بعض عشان ندمرها زي م دمرتنا واحترت من دي منو وفي لحظتي رديت عليها وكتبت ليها رقم قلت ليها اتواصلي معاي واتس وما ترسلي هنا لانو زوجي مراغب الواتس وحزرتها شديد وعملت اسكرن للرسايل وحظرتها وحذفت الدردشه عشان مي ما تشوفها وشغلت خاصيه الرسايل تكون في الجهاز فقط يعني الرسايل البتصلني ما ح تصلها والبتصلها م ح تصلني قلت ليهو رامي انا بقيت خايفه علي سمعتي انا م خايفه منهن يعملن لي حاجه خايفه علي سمعتي انا عندي بت م نفسي اخلي عيونها منكسره والاتنين ديل لو اتلمن علي ح يخربن سمعتي قال لي شوفي ي نوسه انا عايز اقول ليك كلام خالد دا م راجل لو راجل كان وقف المهزله دي ما بخاف من مرتو ويستقيل وتاني شي مرتو سايطه البلد كلها لا مخليه سفير لا وزير لا فنان لا شاعر بس انا م ح افضحها لو ادعا الامر وزادت في حركاتها دي بديها ليك درس عمرها ما تنساهو وعبله مرت راجلك خليها علي وما تخافي انتي بس ابقي علي راجلك عشره واجدعي الماضي وراك وخلي بالك من بتك وراجلك وانا قاعد م ح اخزلك قلت ليهو الحمد لله ي رامي انا صارحت زوجي قبل الفضيحه دي قال لي كيف قلت ليهو لمن طلبت الطلاق وريتو اني اخترت غيرو قال لي نوسه دا كلام شنو قلت ليهو لخير ابدا م اترددت اني اوريهو عشان يطلقني لانو كان معلقني والحاجه دي خففت علي رده فعلو بعد الفضيحه الحصلت ووعدني انو يقيف جنبي قال لي م عارف بس نحنا السودانيين ديل حمق وغيورين علي عرضنا وكونو انو زوجك صارحتيهو وما قتلك معناتا هو غلط فيك غلط كبير وراجع حساباتو ويا نوسه نصيحتي ليك راجلك دا ابقي عليهو عشره خالد لو فيهو خير كان لما مرتو دي ما مخليه واحد ما عامله معاهو علاقه والشي القاطع قلبي بتحول ليهم قروش يعني الشقيان التعبان المسكين خالد تشيل قروشو وتحولن للاولاد قصص غريبه ياخ ماعارف بس ختيت خطوط كتيره تحت الزواج احتمال اتعلمت درس لو م عندي قدره احتوي بت الناس وما اظلمها معاي ما بتزوج احسن اقعد عازب من اشيل ذنبين ذنب اني قصرت في حقها وظلمتها وذنب انها بسبب تقصيري شافت غيري انا متاكد انتي عينك م طايره وزي ما قلتي انتي انثي ضعيفه لقيتي الاهمال من زوجك وكلمه بسيطه من غيرو ضعفتي ومتاكد ما بالسهوله ضعفتي بس المشاكل والهموم قربتك من الشخص الخطأ وقدر الله وما شاء فعل انا اخووك ومعاك ما تخافي قلت ليهو جزاك الله الف خير وطارق زوجي عارف انك ح تساعدني وعمري م ح اتكلم مع ولد من غير هو م يعرف حتي لو اخوهو.
قال لي عين العقل ومنتظر منك الرسايل الاتحذفت عشان نظره الناس ليك وتبرئ نفسك قلت ليهو نفسي بجد قال لي بتسسهل ويلا سلام قفل الخط وبقيت خايفه اكتر مما خايفه من قبل عبله ما شالتني من راسها حتي لو رامي قدر عليها في الدردشه مدام نفسها تدمرني ح تعمل اي شي لانها قادره طارق جا سلمت علي وشكلو تعبان شديد حتي ملامحو مخطوفه وشايل ليهو كيس خدار وعيش وفواكه قال لي كيف قيلتي قلت ليهو تمام الحمد لله انت كيف ومالك تعبان كده قال لي لا عادي الشغل كان كتير وملابسو كانت وسخانه قلت ليهو شغل شنو ي طارق البخليك وسخان كده قال لي عادي طبيعه شغلي كده قلت ليهو طبيعه شغلك كيف يعني المحل وين قال لي انتي نسيتي اني فضيت الشراكه وبعتا العربيه وراس المال العندي عرست بيهو قلت ليهو شغال شنو طيب مافاهمه انا قال لي شغال في المحل عتاله انا انخلعتا ودموعي جرت حسيت نفسي ظالمه قلت ليهو لا يا طارق ما تشتغل كده وبعدين انت عندك شهاده قال لي الشهاده م اشتغلت بيها زمان وبقت عندي خبره بعد العمر دا ياتو شركه البتقبلني وما عندي خبره قلت ليهو طارق طيب النديك القروش العندي استثمر بيهن اي حاجه قال لي لا انا اموت بالعتاله وما بشيل تاني حق مرتي وكلمتك قلت ليك قروشك حقاتك انتي وبتك وانا اولادي بأكلهم بي ضراعي دا وهسي انتي مالك انا شكيت ليك بالعكس ي نوسه حلاوتها في شقاوتها ولا تلقاها جاهزه انا كده مستمتع اني شغال رزق اليوم وبجيب احتياجات اولادي وكان شايل ليهو عروسه قال لي نور وين دخل الغرفه لقاها نايمه اول م بدنقر فيها باسها صحت وبقت حاضناهو نور بتحب ابوها حب م عادي زمان كان بطنشها بس هسي روحو ونفسو نور قال لي اها ح تقعدي تعايني لينا كده انا جيعان امشي جبت ليك لحمه ظبطيها لينا مسافه استحما قلت ليهو اعفي لي سرحتا قال لي م تسرحي خليها علي الله وانا معاك جيت جنبو لانو كان مادي لي يدو قال لي اطمني ماف شي بحصل اكتر من الحصل قلت ليهو م عارفه بس حاسه اني م كويسه قال لي معليش ايام وح تعدي وما تخربي علينا اللحظات الجميله دي ورينا ابتسامتك الحلوه ويلا نحنا جيعانين موش كده يا نور نور قالت ليهو اي انا جيعانه قلت ليها مستهبله هسي اكلتي قعدت تضحك قلت ليهم طيب النمش المطبخ وبجيكم طارق قال لي نور بستحما وارح نصلي سوا وكان جايب ليها مصلايه صغيره وعبايه صلاه
مشيت المطبخ وبديت اعمل في الاكل وبقيت سرحانه قلت هسي طارق دا لو كان معاي زي هسي وما عرس عبله كان حصل الحصل علينا دا تاني بقيت استغفر قلت الحصل كلو قسمه ونصيب والحمد لله انها جات علي كده وربنا ينور بصيرتي والحصل لي ح اخليهو عظه وعبره لي غيري عشان ما يقعن وقعتي الحياه ما كلها حلوه وزي ما بنتمني ولازم نستحمل عملت الاكل وجبتو وطارق كان مستمتع قال لي معقوله كنتي عايزه تحرميني من اكلك دا قلت ليهو معليش يا طارق قال لي ربنا م يحرمني منك ولا من نور وان شاء الله تخاويها قلت ليهو ان شاء الله بس انت العليك كتير انا ونور ومرتك التانيه واولاد عبله واهلك قال لي كلو بي رزقو ومرتي التانيه حامل م شاء الله وعقبالك حسيت بي غيره رغم اني كنت مضايقه من طارق وشبه مشاعري ليهو انتهت وبعد رجوعي ليهو بديت اصحي علاقتنا طارق عاين لي قال لي حاسي بيك بس انتي معزتك براها وهي معزتها براها انتي حبيبه عمري وحبي الصادق وهي السندتني في عز حوجتي واحتوت اولادي لا ح اقلل منها ولا ح اقلل منك وربنا يقدرني واعدل بيناتكم قلت ليهو طارق ممكن سؤال قال لي طوالي وكان بياكل وبأكل في نور قلت ليهو عبله لو جاتك راجعه ح ترجعها حسيتو بلع اللقمه بالعافيه قال لي نوسه موش المستحيلات سبعه التامنه اني ارجع عبله انا م صدقت اني اتخلصتا من كابوس وعمري م حزنت عليها ولا لحظه ولا بتزكر شكلها لو بتصدقيني واقول ليك شي اولادها من اول يوم بكو فيهو تاني ما اتزكروها ومبسوطين شديد وعاوزك انتي تنسيها نهاي قلت ليهو بس هي كيف تنساني يا طارق قال لي هي وين تاني م ح تتلاقو طالما جدعت اولادا حكيت ليهو بي كلام رامي وانو هكر صفحت البت الكتبت فيني منشور ومن ضمن الرسايل لقا رسايل عبله قال لي مالا كمان قلت ليهو قالت عاوزه تخت يدها معاها ويفضحوني اكتر قال لي م يهمني شي وتاني شي الموضوع دا انا بنرفزني ممكن تاني م تتكلمي فيهو ي نوسه ولو بتسمعي كلامي الموضوع دا يقيف هنا 👈 قلت ليهو وكلام الناس النبزوني انا عاوزه ارد شرفي قال لي الناس اتكلمو في السيده عائشه انتي منو عشان م يتكلمو فيك لو باريتي القيل والقال ح تقعي في مشاكل اكبر ونحنا دايرين نعيش وما نحرم بتنا من لمتنا قلت ليهو امك واختك قال لي امي مالا دخلها شنو قلت ليهو انت عارف انها م بتحبني وبعد الكلام دا ح تكرهني اكتر قال لي اول شي امي مستحيل تعرف الكلام دا وعلي فكره اختي لمن شافت الكلام ووصلتو لي قالت لي نوسه مستحيل تعمل كده والدردشه دي مفبركه واكيد دي عبله مرتك عاوزه تخرب سمعت نوسه بعد خسرت القروش عشان كده انا قلت ليك وقفي الكلام دا حدي هنا نوسه م كل البتقال حقيقه وما كل البنشوفو حقيقه في حاجات حقيقه وما ظاهره لينا وفي حاجات ظاهره لينا وما زي الحقيقه عشان نعيش نفوت وما تعقدي الامور اكتر خليها كده قلت ليهو وزملائي الانفضحت قدامهم وزميلاتي الفي نظرهم انا كعبه قال لي دقيقه زملائك وزميلاتك ديل ما شايفين سلوكك اكيد الكلام دا م ح يدخل عليهم تتزكري لمن وريتي الولد الكلام قال ليك شنو قال ليك انتي انسانه محترمه والكلام دا م بشبهك ليه ما صدق الكلام والقال هدي الدردشه ودي الصوره رده فعلو زي رده فعل زملائك بس بكونو مصدومين وعادي واعملي لي اعتبار وانسي وخلينا نعيش قلت ليهو حاضر
علاقتي رجعت مع طارق احلي من مما كنت بتمنا طارق بقا حريص شديد وبعمل الف حساب في علاقتنا وحتي امو وقفها عند حدها قال ليها الما بحترم مرتي وبتي معناتا م بحترمني انا
واختو جاتني في البيت واتناقشت معاي في الموضوع وطبعا نكرت ليها اي شي وقلت ليها عبله عاوزه تتفق مع مره زميلي في الشغل وعاوزات يفضحني ووريتا اخر رسايل من عبله انها عاوزه تخرب حياتي قالت لي سبحان الله زي م اتوقعتا ربنا اكفيك شرها واتحصني وحصني بيتك والمشاكل ما شبهكم استهدو بالله وكلو بهون زوله فاهمه حتي في نقاشها معاي سبحان الله ربنا اداني حموات بس النسيبه كعبه لكن طارق حسم الموضوع وبقت تعمل حساب حتي في ونستا وبقينا كل جمعه بنتلم عند امو واتعرفت علي مرتو الجديده اصغر مني وطيبه طيبه تقطع القلب ونهاي م حسستني انها ضرتي بالعكس حسيتا زي اختي
مرت الايام وفادي قال لي جيبي التلفون وتعالي مشيت ليهو ف الشركه وعمل لي استرداد لكل الدردشات قلت ليهو انا زوجي قال لي توقفي الكلام دا حدي هنا بس عاوزه الدردشه سلاح قال لي والله كلامي نفس كلام راجلك الكلام دا اختصريهو وربنا يهدي سرك قلت ليهو امين وشكرتو ومشيت سالت رامي من عبله قال لي اعوذ بالله منها البت دي بتحقد عليك من بدري ربنا يكفيك شرها لكن م عليك انا سايقها سواقه مبالغه وطبعا انا بتونس معاها شات ع اساس اني مي واخت يدي في يدها وندمرك وكنت عاوز اتصل اقول ليك البت دي قالت لي انها ح تخش حياتك تاني وتتزوج اخوك قعدت اضحك قلت ليهو ياريت عشان مرت اخوي تفشخها مفتكراها زيي انا ح تسكت وتستلم لا والله دي تمرمط بيها الارض لكن عشان نتقي شرها ح احزر اخوي شديد قال لي بس الله ينور عليك ووربنا يستر عليك قفلت منو وبقيت افكر عبله اكتر من الشالتو تاني ح تعمل شنو ………يتبع

 

• لقراءة باقي فصول الرواية أضغط على (رواية أحببت وأنا على ذمة رجل اخر)